पक्राउ परेका १६ जनालाई थप २ दिन हिरासतमा राख्न अदालतले दियो अनुमति

९ जेठ, काठमाडौं ।  काठमाडौं जिल्ला अदालतले नक्कली भुटानी शरणार्थी प्रकरणको अनुसन्धानका क्रममा हिरासतमा रहेका १६ जना विरुद्ध २ दिन म्याद थप गरेको छ । अदालतले पूर्व उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण, नेपाल सरकारका सचिव टेकनारायण पाण्डेसहित हिरासतमा रहेका सबैको म्याद २ दिन थप गरेको हो ।

नक्कली शरणार्थी प्रकरणमा कांग्रेसका पूर्वसांसद आङटावा शेर्पा, तत्कालीन गृहमन्त्री रामबहादुर थापाका सल्लाहकार इन्द्रजीत राई, मोरङका केशव दुलाल, ललितपुरका सानु भण्डारी, मोरङका सागर थुलुङ राई, खाणका तत्कालीन स्वकीय सचिव नरेन्द्र केसी, रायमाझीका छोरा सन्दीप, पाँचथरका टंक गुरुङ, दाङका सन्देश शर्मा पोखरेल, सुनसरीका गोविन्द चौधरी, काठमाडौंका रामशरण केसी पक्राउ परिसकेका छन् ।

उनीहरूलाई प्रहरीले विभिन्न मितिमा फरक–फरक ठाउँबाट पक्राउ गरेको हो । उक्त प्रकरणमा पूर्वगृहमन्त्री थापाका छोरा प्रतीकसहित दुई जना आरोपित भने फरार रहेका छन् । प्रहरीले उनीहरुको अनुसन्धान प्रतिवेदन सोमबार नै सरकारी वकिलको कार्यालयमा बुझाई सकेको छ ।