घोराही सिमेन्टको आईपीओ बाँडफाँट, कतिले पाए शेयर ?

१४ जेठ, काठमाडौं । घोराही सिमेन्ट इन्डस्ट्रीले वैदेशिक रोजगारीमा रहेका नेपालीहरुलाई जारी गरेको आईपीओ शुक्रबार बाँडफाँट गरेको छ । कम्पनीले रितपूर्वक आवेदन दिएका सबै आवेदकहरूलाई कुल ६ लाख ६ हजार ३५० कित्ता शेयर बाँडफाँट गरिएको जानकारी गराएको छ । यद्यपि, यसले वैदेशिक रोजगारीमा रहेकालाई वैशाख १९ गतेदेखि जेठ २ गतेसम्म कुल ७ लाख ५४ हजार ६६१ कित्ता शेयर बिक्री खुला गरेको थियो ।

यसआधारमा जारी भएकोमध्ये १ लाख ४८ हजार ३११ कित्ता शेयर बिक्री भएको छैन । बिक्री नभएको उक्त शेयर अब सर्वसाधारणलाई थप गरी निष्काशन हुनेछ । वैदेशिक रोजगारीमा रहेकाहरुले बिक्री प्रबन्धक हिमालयन क्यापिटल तथा नबिल इन्भेष्टमेन्ट बैंकिङको वेबसाइटबाट आईपीओको नतिजा हेर्न सक्नेछन् । यस्तै, सीडीएस एन्ड क्लियरिङले आईपीओ नतिजा हेर्न बनाएको वेबसाइटबाट पनि हेर्न सकिनेछ । 

 यता, आयोजना प्रभावित स्थानीयका लागि भने हाल आईपीओ खुला रहेको छ । स्थानीयले ३ लाख ९७ हजार १९० कित्ता आईपीओका लागि जेठ १७ गतेसम्म आवेदन दिन सक्नेछन् । घोराहीले फेस भ्याल्यू १०० रुपैयाँमा ३०० रुपैयाँ प्रिमियम थप गरी प्रतिकित्ता ४०० रुपैयाँको दरले आईपीओ जारी गरेको हो ।