गौर हत्याकाण्डसम्बन्धी मुद्दाको सुनुवाइ न्यायाधीश रेग्मीको इजलासमा हुने

२९ जेठ, काठमाडौं । रौतहटको गौरमा २०६४  चैत २७ मा भएको नरसंहारकारी गौर हत्याकाण्डविरुद्धको मुद्दा सुनुवाईका लागि सर्वोच्च अदालतमा पेसी तोकिएको छ । सुनुवाइको पेसी न्यायाधीश कुमार रेग्मीको एकल इजलासमा परेको छ ।

यही जेठ २१ गते त्रिभुवन साहले जिल्ला प्रहरी कार्यालय रौतहट गौर तथा जिल्ला सरकारी वकिलको कार्यालय रौतहटलाई विपक्षी बनाइ मुद्दा दायर गराएका थिए ।

पहिलो संविधानसभाको निर्वाचनमा मतदान हुने दिनको अघिल्लो दिन एकै स्थानमा मञ्च बनाउने विषयमा उपेन्द्र यादव नेतृत्वको मधेसी जनाधिकार फोरम र प्रचण्ड नेतृत्वको तत्कालीन नेकपा (माओवादी)का कार्यकर्ताबीच चलेको विवादमा दुई पक्षबीच झडप हुँदा २७ जना माओवादी कार्यकर्ताको निर्मम तरिकाबाट हत्याभएको थियो ।