विश्वकप क्रिकेट छनौटः नेपालले जिम्बाव्वेलाई दियो २९१ रनको लक्ष्य

३ असार, काठमाडौं । विश्वकप क्रिकेट छनोट खेलमा नेपालले जिम्बाव्वेलाई २९१ रनको लक्ष्य दिएको छ । हरारेमा टस जितेर पहिला ब्याटिङ गरेको नेपालले ५० ओभरमा ८ विकेट गुमाउँदै ‍‍ २९० रन जाेडेकाे हो ।

नेपालका लागि ओपनर ब्याट्सम्यानद्वय भुर्तेल र आसिफ शेखले एक सय ७१ रनको साझेदारी गरेका थिए ।भुर्तेल एक्लैले ९९ रनको योगदान गरे । केवल एक रनका कारण सतक पूरा गर्नबाट चुकेका उनले ९५ बलको सामना गरी दुई छक्का र १३ वटा चौका प्रहार गरे ।

अर्का ओपनर आसिफ शेखले पनि ६६ रन जाेडे । उनले १०० बलमा ७ चौका हिर्काए । कुशल मल्लले ४१ रन याेगदान गरे । आक्रामक रुपमा प्रस्तुत भएका उनले केवल ४२ बलको सामना गरी ३ छक्का र २ चौका हिर्काए ।

चौथो नम्बरमा क्रिज समाल्न आएका कप्तान रोहित पौडेलले ९ बलमा पाँच चौका प्रहार गरी ३१ रन बनाए ।