प्रतिजसुसी संयन्त्र स्थापना गर्न र देशभित्रै सेनाका बन्दुक बनाउन सुरु गर्नुपर्छ  ः रघुजी पन्त

८ असार, काठमाडौं । एमालेका सांसद रघुजी पन्तले मुलुकमा प्रतिजासुसी संयन्त्र स्थापना गर्नुपर्ने बताएका छन् । शुक्रबार प्रतिनिधिसभाको बैठकमा रक्षा, गृह, पर्यटन मन्त्रालय र प्रधामन्त्री र राष्ट्रिय योजना आयोगको विनियोजन विधेयकमाथि धारणा राख्दै सांसद पन्तले प्रतिजासुसी संयन्त्र स्थापना गर्न ढिला भइसकेको बताए । साथै, उनले नेपाली सेनाका लागि चाहिने बन्दुक देशभित्रै बनाउन सुरु गर्नुपर्ने बताए । 

देशभित्र सुरक्षा खतराबारे बुझ्न जासुसी निकाय रहेपनि यसले मात्र पूर्ण सुरक्षाबारे पूर्व जानकारी लिन अपुग भइरहेको बताए । विदेशीले नेपालमाथि भूमिमाथि समेत हस्तक्षेप बढाएको भन्दै विभिन्न प्रकारका हस्तक्षेपबारे सूचना लिएर प्रतिवादका लागि ठोस रणनीति तय गर्न प्रतिजासुसी संयन्त्र अनिवार्य भएको बताए । 

यस्तै उनले नेपाली सेना विश्वमै अकाट् गौरव र इतिहास बोकेको सेना रहेको भन्दै समयानुकूल विकसित र प्रविधियुक्त बनाउँदै लैजानुपर्ने अहिलेको आवश्यकता रहेको बताए । उनले सेनालाई चाहिने हातियार र गोलीगठ्ठ देशभित्रै बनाउनुपर्ने बताए । ‘सेनाले विदेशीबाट ल्याएको बन्दुक मात्र बोक्नबाट मुक्त गर्न देशभित्रै बन्दुक बनाउन सुरु गर्नुपर्छ’ उनले भने, ‘हाम्रा सेना विश्व शान्तिमा अब्बल कहलिएका छन्, अब आफैंले बन्दुक बनाउनुपर्ने बेला भएको छ । त्यसका लागि पर्याप्त बजेट छुट्याउनुपर्छ । विनियोजित बजेट कम भएको छ ।

साथै उनले गृह मन्त्रालसँग मात्र भर नपरी आवश्यक पर्दा शान्ति सुरक्षा कायम गर्न सक्ने जनशक्ति र स्रोत प्रधानमन्त्रीसँग हुन आवश्यक रहेको बताए । प्रधानमन्त्रीले धर्म र संस्कृतिलाई समान रुपमा लिन सक्नुपर्ने बताए । ‘उदाहरणका लागि भारतको मणिपुरमा जारी जातीय हिंसालाई हेरे मात्र पुग्छ’ उनले भने, ‘त्यहाँ झडपमा उत्रिएका दुवै पक्ष आदिवासी नै हनु् । तैपनि राज्य संचालन गर्नेले विचार पुर्याउन नसक्दा त्यो अवस्था आएको छ ।