प्रधानमन्त्रीको उपस्थितिमा पोखरामा सातै प्रदेशका मुख्यमन्त्रीहरुको भेला

१५ असार, पोखरा । आज सातै प्रदेशका मुख्यमन्त्रीहरूको भेला हुँदैछ । यसका लागि प्रधानमन्त्री पुष्पकमल दाहाल प्रचण्ड शुक्रबार पोखरा आउने कार्यक्रम यसअघि नै तय भइसकेको छ । गण्डकी प्रदेश सरकारको आयोजनामा सातै प्रदेशका मुख्यमन्त्रीहरूको पोखरामा भेला हुन लागेको हो । 

उनीहरू दुई दिनसम्म पोखरामा संघीयता र प्रदेशका हक अधिकारका बारेमा छलफल गर्नेछन् । कोशी प्रदेशका मुख्यमन्त्री आउने नआउने भन्ने बारेमा अन्योल कायमै रहेको छ । आज कोशी प्रदेशका मुख्यमन्त्रीले विश्वासको मत लिने भए पछि पोखरामा हुने यस कार्यक्रममा उनको उपस्थिति अन्योलमा परेको हो । 

गण्डकी प्रदेश सरकारकी प्रवक्ता तथा ऊर्जा मन्त्री सरस्वती अर्यालका अनुसार यसअघि जेठ १० का लागि तोकिएको भेला प्राविधिक कारण सम्पन्न हुन नसके पनि यसपटक बोलाइएको भेला भने शुक्रवार र शनिबार गरी दुई दिनसम्म चल्नेछ । 

आजबाट सुरु हुने सातै प्रदेशका मुख्यमन्त्रीहरूको भेला दोस्रो हो । पहिलो पटक २०७५ भदौ २१ र २२ गते गण्डकीका तत्कालीन मुख्यमन्त्री पृथ्वी सुब्बा गुरुङको पहलमा पहिलो पटक मुख्यमन्त्रीहरूको भेला भएको थियो ।