एनएलजी इन्स्योरेन्सलाई ६६ प्रतिशत हकप्रद निष्काशनको अनुमति

१८ असार, काठमाडौं । नेपाल बीमा प्राधिकरणले एनएलजी इन्स्योरेन्स कम्पनीलाई ६६ प्रतिशत हकप्रद शेयर निष्काशन गर्न अनुमति दिएको छ ।

कम्पनीको पुँजी वृद्धि गर्ने उद्देश्यले शकप्रद शेयर निष्कासनको अनुमति पाएको हो । शेयर निष्कासनका लागि कम्पनीले राखेको प्रस्तावलाई प्राधिकरणले सोमबार स्वीकृत गरेको हो ।

कम्पनीको हालको चुक्ता पुँजीमा एक अर्ब ४५ करोड ९२ लाखको ६६ प्रतिशत अर्थात ९६ करोड ३१ लाख २२ हजार रुपैयाँको हकप्रद निष्काशन गर्न अनुमति दिएको प्राधिकरणले जनाएको छ । उक्त हकप्रद निष्काशन प्रक्रिया पूरा भएपछि कम्पनीको चुक्ता पुँजी दुई अर्ब ४२ करोड २३ लाख ९८ हजार पुग्ने जनाएकाे छ । 

नेशनल लाइफ इन्स्योरेन्स कम्पनीको सहायक कम्पनीको रुपमा संस्थापित एनएलजी इन्स्योरेन्स कम्पनीलाई प्राधिकरणले चुक्ता पुँजी बढाउने गरी हकप्रद शेयर निष्कासनको अनुमति दिएको हो । 

एनएलजीले कृषि तथा पशु, सम्पत्ति, इन्जिनियरिङ, मोटर बीमा गर्दै आएको छ । अनुमतिसँगै हकप्रद जारी गर्ने काम छिट्टै सुरु हुने कम्पनीले जनाएको छ । 

नेपाल बीमा प्राधिकरण बीमा कम्पनीहरूकाे नियामक निकाय हाे ।