दोहोरो नागरिकता लिएकी नगर उपप्रमुख मीराकुमारी पक्राउ

२१ असार, काठमाडौं । दोहोरो नागरिकता लिएर राज्यलाई झुक्यानमा पार्दै आएकी सप्तरीको डाक्नेश्वरी नगरपालिका उपप्रमुख मीराकुमारी यादव पक्राउ परेकी छन् ।

यादवलाई भारत र नेपालको दोहोरो नागरिकता बोकेको आरोपमा पक्राउ गरिएको सप्तरी प्रहरीले जनाएको छ । पत्नी बुधबार पक्राउ पर्नुअघि देखिनै पति महेन्द्रकुमार यादव भने फरार भएका छन् । उनी दुवै जना  भारतको विहार राज्यअन्तर्गत सुपौल जिल्लाको निर्मली थानास्थित मझारी ग्रामका बासिन्दा रहेको खुलेको छ ।

भारतका नागरिक उनीहरुले नक्कली कागजात पेस गरेर सप्तरीमा नेपाली वंशजका आधारमा नागरिकता लिएका पाइएपछि डाक्नेश्वरीका कृष्णकुमार यादवले प्रहरीमा उजुरी दिएका थिए । सुरुमा उजुरी लिन नमानेपछि उच्च अदालत राजविराजको आदेशपछि प्रहरीले उजुरी लिइ जिल्ला अदालतबाट पक्राउ पूर्जी लिई पक्राउ गरेको हो । 

पक्राउ परेकी मीराकुमारीलाई नागरिकता कसुरमा अनुन्धान हुने प्रहरीले जनाएको छ । उजुरीमा महेन्द्रकुमारलाई पनि प्रतिवादी बनाई खोजी गरिरहेको प्रहरीले जनाएको छ । उनी भारत छिरेको बताइएको छ । भारतीय नागरिक यादव दम्पत्तिले डाक्नेश्वरी नपा-६ (साविकको औरही गाविस-३) ठेगाना देखाएर नेपाली नागरिकता लिएको पाइएको प्रारम्भिक अनुसन्धानमा देखिएको स्रोतको दाबी छ ।

मीराकुमारी २०७९ वैशाख १० मा सम्पन्न स्थानीय चुनावमा कांग्रेसका उम्मेदवारलाई हराएर एमालेबाट नगर उपप्रमुखमा निर्वाचित भएकी थिइन् ।