विवादास्पद अभिव्यक्तिबारे प्रधानमन्त्रीले संसदमा जवाफ दिने, अवरोध खुलाउन सभामुखको परामर्श जारी

२२ असार, काठमाडौं । प्रधानमन्त्री पुष्पकमल दाहाल प्रचण्डले आफूले दिएको विवादास्पद अभिव्यक्तिबारे प्रतिनिधिसभाको बैठकमा स्पष्टीकरण दिने भएका छन् । सरकारमा सहभागी राजनीतिक दलहरूको प्रधानमन्त्रीले राजीनामा दिनु नपर्ने र संसदमा आफ्ना कुरा राख्नुपर्ने भनेपछि प्रधानमन्त्रीले यसबारे स्पष्ट पार्न लागेका हुन् । 

नेपालमा पहिलो पल्ट ट्रक भित्र्याउने व्यवसायी प्रितम सिंहबारे किरणदीप सन्धुले लेखेको पुस्तक विमोचनका क्रममा दिएको अभिव्यक्तिलाई लिएर प्रधानमन्त्री प्रचण्डको आलोचना भइरहेको छ । प्रमुख प्रतिपक्षी एमालेले राजीनामा मागेको छ भने रास्वपालगायतका दलहरूले जवाफमा मागेका छन् ।

प्रधानमन्त्री प्रचण्डले सत्तारुढ गठबन्धनको बैठकमा उक्त प्रसंग आफूले नभई सिंहलाई उल्लेख गरेको र अहिलेको प्रसंग नभएको प्रष्टीकरण दिएका छन् । बिहीबारको प्रतिनिधिसभा बैठक एमाले, रास्वपा र राप्रपाको अवरोधका कारण स्थगित भएको थियो । प्रतिनिधिसभाको अर्को बैठक आज बोलाइएको छ । 

यसैबीच संसद सभामुख देवराज घिमिरेले अवरुद्ध संसद खुलाउन दलका प्रमुख सचेतक र सचेतकहरुसँको छलफल राखेका छन् । सभामुख घिमिरेले ११ बजे प्रमुख सचेतकहरुसँग छलफल सुरु गरेका छन् । सहमति नभए आज पनि बैठक चल्न नदिने एमाले संसदीय दलका उपनेता सुवासचन्द्र नेम्वाङले बताएका छन् । प्रधानमन्त्री प्रचण्डले आजै आफ्नो अभिव्यक्तिबारे विवाद भएपछि संसदमा जवाफ दिने तयारी गरेकाले सभामुखले सहमति खोजिरहेका छन् ।