बैतडीमा हावाहुरी र वर्षाले मकैमा क्षति, किसान चिन्तित

३१ असार, काठमाडौं । बैतडीका विभिन्न क्षेत्रहरूमा हावाहुरी र वर्षाले मकै बालीमा क्षति पुगेको छ । बैतडीका अधिकाङ्श ठाँउहरुमा मकै बालीमा क्षति पुर्‍याएपछि यहाँका स्थानीय किसानहरू चिन्तित बनेका छन्।  घोगा लाग्ने बेला मकै बोट हावाहुरीले ढलेपछि किसानहरू चिन्तित बनेका हुन् ।

किसानहरुले मेहनत गरेर लगाएको मकै घोगा लाग्ने बेला सबै हावाहुरीले नष्ट गरेपछि चिन्ता बढेको बैतडी दोगडाकेदार गाउँपालिकाका वडा नम्बर ८ कालागाउँ पितरकाडा स्थानीय किसान बिरेन्द्र विष्टले बताएका छन् । मकैबाली ढलेर नष्ट भएपछि आफूहरूलाई निकै समस्या भएको अर्का स्थानीय किसान नरबहादुर विष्टले बताए । 

वर्षा नहुँदा सम्म किराले मकैबालीमा क्षति पुर्याएको र बर्षापछि मकै ढलेर झन् क्षति पुर्‍याएको उनले बताए । मकैका बोट ढलेपछी हामीलाई निकै समस्या भएको उनी बताउछन् ।

घोगा लाग्ने बेला ढलेर मकैमा क्षति पुगेको छ’, ‘जसले गर्दा उत्पादन पनि कमी हुने र भोकमरी हुने देखिएको छ ।’ हावाहुरी र वर्षाको प्रभावका साथै जंगली बदेलहरु सुंगुर, दुम्सी,स्याल बादरहरुले समेत प्रत्येक वर्ष मकैबालीमा व्यापक क्षति पुर्‍याउने गरेका छन्।  

बैतडीमा १४ हजार ५ सय हेक्टर क्षेत्रफल जमिनमा मकै खेती गरिँदै आएको भएपनि विभिन्न कारणले मकैबालीमा क्षति हुने गरेको छ । मकै उत्पादनका हिसाबले जिल्लामा राम्रो उत्पादन हुने गरेकोमा विभिन्न कारणले उत्पादनमा ह्रास आउने गरेको कृषि ज्ञान केन्द्र बैतडीले जनाएको छ । 

पछिल्लो दुई तीन वर्ष यता मकैमा फौंजी किराले नोक्सानी पुर्याउने गरेको र घोगा लाग्ने समयमा जंगली जनावरबाट समेत मकै जोगाउन निकै मुस्किल हुने गरेको स्थानीय  किसानहरूले बताउँछन् । बाली बिमा नहुँदा किसानले क्षति भए पनि राहत पाउँदैनन्।