सर्वोच्चः सांसदलाई रकम दिने निर्णयविरुद्धको रिटमा आज दुबै पक्षसँग छलफल गर्ने

१६ साउन, काठमाडौं । सांसदलाई बजेट दिने सरकारको निर्णयविरूद्ध सर्वोच्च अदालतमा परेको रिटमा आजका लागि पेसी तोकिएको छ । निर्वाचन क्षेत्र पूर्वाधार विकास कार्यक्रमको औचित्यमा सरकारको जवाफ मागेको इजलासले अन्तरिम आदेशका लागि आज पेसी तोकेको हो । 

उक्त बजेट निर्वाचन क्षेत्र पूर्वाधार विकास कार्यक्रमको व्यवस्था गरिनु संविधानले परिकल्पना गरेको शक्ति पृथकीकरण र संघीयताको सिद्धान्त विपरीत भएकाले बदरभागी भएको भन्दै रिट दायर भएको थियो । रिट निवेदनमा प्रधानमन्त्री तथा मन्त्रिपरिषदको कार्यालय, अर्थ मन्त्रालय, कानुन, न्याय तथा संसदीय मामिला मन्त्रालय, संसद सचिवालयलाई विपक्षी बनाइएको छ ।

अन्तरिम आदेशको छलफलका लागि आज दुवै पक्षलाई डाकिएको छ । अब दुवै पक्षको बहसपछि सर्वोच्चले अन्तरिम आदेश दिनुपर्ने नपर्ने सम्बन्धमा निर्णय गर्नेछ । सरकारले बजेटमा राखेको निर्वाचन क्षेत्र पूर्वाधार विकास कार्यक्रम विरुद्धको रिटमा अदालतले यसअघि कारण देखाउ आदेश जारी गरेको थियो । अधिवक्ता सागर बराल, सौगात राज बराल र कानुनका विद्यार्थी अविनेश अधिकारीले दायर गरेको रिटमा न्यायाधीश हरिप्रसाद फुयालको एकल इजलासले सरकारका नाममा कारण देखाउ आदेश जारी गरेको थियो । 

सरकारले आर्थिक वर्ष २०८०-०८१ को आय व्ययको अनुमान (बजेट वक्तव्य)को ४४५ नम्बर बुँदामा निर्वाचन क्षेत्रका लागि पाँच करोड बजेट विनियोजन गर्ने गरी व्यवस्था गरेको छ । आज दुवै पक्षसँग छलफल गरेपछि आदेश हुने बताइएको छ ।