प्रधानन्यायधीशले भने:- न्यायालयका कारण न्यायाधीश नियुक्ति रोकिएको होइन

१६ साउन, काठमाडौं । प्रधानन्यायाधीश हरिकृष्ण कार्कीले न्यायालयका कारण नभइ अन्य कुनै कारणबाट न्यायाधीश नियुक्ति प्रभावित भइरहेको बताएका छन् ।

अनौपचारिक क्षेत्र सेवा केन्द्र इन्सेकले मंगलबार ललितपुरमा आयोजना गरेको कार्यक्रममा प्रधानन्यायाधीश कार्कीले सर्वोच्च, उच्च र जिल्ला अदालतमा न्यायाधीश पद रिक्त रहेको भन्दै न्यायालयका कारण नभई अन्य कुनै कारणबाट न्यायाधीश नियुक्ति प्रभावित भइरहेको बताएका हुन् ।

कानुन र संविधानमा न्यायाधीश खाली हुनुभन्दा एकदेखि तीन महिनाभित्र नियुक्ति गर्नुपर्ने व्यवस्था रहेपनि कानुनको पालना गर्न नसकिएको उनले बताए । प्रधानन्यायाधीश कार्कीले अहिले राजनीतिक स्वार्थका आधारमा सार्वजनिक सरोकारका विवादहरु न्यायालयमा आउनु सुखद नभएको जिकिर गरे ।

उनले सार्वजनिक सरोकारका विषय सीमान्तकृत समुदायको अधिकार प्राप्तिका लागि कुनै एउटा समूहले प्रतिनिधित्व गर्नका लागि गरिदिएको व्यवस्था भएको धारणा राखे । उनले न्यायालय स्वच्छ र राजनीति हस्तक्षेप मुक्त नभए जनताको मानवअधिकारको हक स्थापित हुन नसक्ने बताए ।