सम्बन्ध विस्तारका लागि कांग्रेसले सञ्चार माध्यम र सञ्चारकर्मीको लगत विवरण संकलन गर्ने

१६ साउन, काठमाडौं । नेपाली कांग्रेसले लोकतन्त्रमा आस्था राख्ने देशभरका सञ्चार गृह र यस क्षेत्रमा कार्यरत सञ्चारकर्मीहरूको लगत विवरण संकलन गर्ने भएको छ । कांग्रेसको सञ्चार क्षेत्रसँग सम्बन्ध विस्तारका लागि उनीहरूको लगत विवरण संकलन गर्न लागिएको हो । आज बसेको सूचना, संचार तथा प्रचार विभागको बैठकले यस्तो निर्णय गरेको हो ।

बैठकमा प्रचार विभागका सदस्य एवं वरिष्ठ पत्रकार इन्द्र रिजालले लोकतन्त्र पक्षधर सञ्चारकर्मीहरूको विवरण संकलन गरी लगत राख्नुपर्ने प्रस्ताव गरेका थिए । उनको प्रस्तावपछि नेपाल प्रेस युनियनसँग समन्वय गरी  लगत राख्ने निर्णय भएको हो ।  

विभागका प्रमुख मीनबहादुर विश्वकर्माको अध्यक्षतामा मंगलबार बसेको बैठकले नेपाली कांग्रेस सूचना, संचार तथा संचार विभागको निर्देशिका, २०८० सामान्य परिमार्जनसहित सर्वसम्मतले पारित गरेको छ । यस्तै विभागले पुस्तकालय व्यवस्थापन तथा संचालनका लागि नेपाली कांग्रेस केन्द्रीय कार्यालयसित समन्वय गर्ने र विभागका प्रमुख एवं सदस्यहरू बीच सूचना प्रविधि सम्बन्धी पुर्नताजगीकरण कार्यक्रम गर्ने र सो को मिति, समय र स्थान प्रमुखले तोक्ने निर्णय पनि गरिएको छ । 

बैठकले सबैकाे कार्य प्रगति नियमन तथा व्यवस्थापन गर्ने उद्देश्यले नेपाली कांग्रेसका सबै तहका समितिलाई केन्द्रीय कार्यालयको जस्तै आधिकारिक फेसवुक एकाउण्ट खोल्न आग्रह गर्ने निर्णय पनि गरेको छ । कांग्रेसले सुधारका विभिन्न कार्यहरुलाई जनतासम्म पुर्याउन लोकतन्त्रमा आस्था राख्ने संचार गृह र संचारकर्मीको विवरण प्रेस युनियनलगायत सम्बन्धित निकायसँग समन्वय गरी संकलन गर्ने निर्णय भएको जारी विज्ञप्‍तिमा उल्लेख छ ।