आवाजविहिनहरुका लागि आवाज बुलन्द गर्दै माइतीघर मण्डला !

१८ साउन, काठमाडौं । संघीय राजधानी काठमाडौंको मुटुमा पर्छ माइतीघर मण्डला । प्रधानमन्त्रीदेखि तहबिहिन कर्मचारीसम्म बस्ने केन्द्रीय सचिवालय सिंहदरबार र सर्वोच्च अदालतदेखि नेपाली सेनाको मुख्यालयसम्म यसको नजिक छन् । देशभरीबाट केन्द्रीय राजधानीको मुख्यालय प्रवेश गर्न यही मार्ग भएर प्रवेश गरिन्छ । यसैले पनि सुरक्षाका दृष्टिले यो क्षेत्र निकै संवेदनशील पनि छ ।

यसरी सबैतिरबाट निकै संवेदनशील मानिएको यो माइतीघर क्षेत्र विगत केही वर्षदेखि सबै पक्षको आन्दोलन गर्ने केन्द्रविन्दु भएको छ । देशभरीबाट अन्यायमा परेकाहरु आफ्नो पीडा सुनाउन र देखाउन माइतीघर आइ पुग्न थालेका छन् । यसैले पनि माइतीघर मण्डला आवाजविहीनहरुको आवाज बुलन्द गर्ने थलोका रुपमा विकसित भएको छ । 

घर झगडादेखि राष्ट्रको सीमा मिचाएकोसम्म मुद्दामा राज्यको ध्यानाकर्षण गराउन सबै जनाले यसै माइतीघरलाई चुन्दै आएका छन् । माइतीघर यति व्यस्त बन्न थालेको छ यसले अब २४ सै घण्टा फुर्सद नपाउने भएको छ । माइतीघरमा अहिले भान्साघर, सुत्ने ओछयानदेखि अस्थायी शौचालयको निर्माण समेत गरिएको छ । पानी पर्दा ओत लाग्नको लागि पनि राम्रै व्यवस्था गरिएको छ । सहकारी पीडितहरु महिनौदेखि यही धर्ना कसेर बसेका छन् । 

 
संघीय शिक्षा ऐनको पक्षमा नाराबाजी गर्दै यहाँ हरेक दिन शिक्षकहरूको शिक्षा प्रेमीको नाराबाजी घन्कने गर्छ । यस्तै मिटरव्याज पीडितहरुले धर्ना कसेको त महिनौ बितिसक्यो । यति मात्र नभइ घर भित्रका मुद्दा लिएर माइतीघरमा धर्ना कस्नेहरु पनि कम छैनन् । 
 
अहिले यहाँ सामूहिक रुपमा चन्दा उठाएर सामूहिक मेस चलाइएको छ । मोबाइल चार्जको लागि पनि व्यवस्था मिलाइएको छ । सरकारले सिंहदरबार वरिपरिको ठूलो क्षेत्र निषेधित क्षेत्र घोषणा गरेको छ । तर माइतीघरलाई भने त्यो निषेधले छुँदैन । त्यही भएर पनि माइतीघरमा आवाज हरेक दिन बुलन्द बनेर घन्कने गर्छ । 

विगत ११ महिनादेखि तलब नपाएका वनका कर्मचारीहरू पनि देशभरबाट आएर अहिले माइतीघरमा नै भेला भएका छन् । उनीहरूलाई तलबको मात्र चिन्ता छैन आफुहरुले दुःख गरेर हुर्काएको वन पनि मासिने हो कि भन्ने चिन्ता छ । कतिपय मुद्दामा सरकारका वरिष्ठ मन्त्रीहरू नै आएर आन्दोलनरत समूह र व्यक्तिसँग भेटेर समस्याको सम्बोधन गर्ने गरिएकाले पनि माइतीघरमा ‘चाम’ बढेको छ ।

सबैको मुद्दा नसुलिएला तर धेरैको मुद्दा यहाँ आइपुगेपछि सुनुवाइ पनि भएको छ । माइतीघर यसैले पनि दुःखमा परेका, पीडामा परेका र अन्यायमा परेकाहरूका लागि आवाज उठाउने भरपर्दाे थलोको रुपमा विकसित भएको छ ।