नागरिकता मुद्दामा धरौटीमा रिहा भएकी डाक्नेश्वरीकी उपप्रमुख मीराका श्रीमान जेल चलान

१९ साउन, काठमाडौं । कीर्ते कागजात पेश गरी नेपाली नागरिकता लिएको कसुरसम्बन्धी मुद्दामा एक लाख रुपैयाँ धरौटीमा रिहा भएकी सप्तरीको डाक्नेश्वरी नगरपालिकाकी उपप्रमुख मीराकुमारी यादवका श्रीमान महेन्द्रकु्मार यादवलाई मुद्दा पुर्पक्षका लागि जेल चलान गरिएको छ । 

‘नक्कली’ नागरिकता कसुरमा आत्मसमर्पणपछि २३ दिन प्रहरीको न्यायिक हिरासतमा बसेको मीराकुमारी साउन ८ मा नै धरौटीमा रिहा भएकी थिइन् । उनलाई जिल्ला अदालतका न्यायाधीश हरिशचन्द्र इङगनामको इजलासले धरौटी बुझी तारेखमा छाडेको थियो । स्थानीय कृष्णकुमार यादवको जाहेरीले मीरा दम्पत्तिलाई प्रहरीले अदालतबाट पक्राउ पूर्जी लिएर पक्राउ गरेको थियो । 

पछि न्यायाधीश लालकाजी श्रेष्ठको इजालसले बिहीबार महेन्द्रकुमारलाई जेल चलान गर्न आदेश दिएकाे हाे । आदेशपछि उनलाई राजविराज जेलमा लगिएको छ । मीरा दम्पत्तिले भारत र नेपालको दोहोरो नागरिकता लिएको आरोपमा जाहेरी परेको थियो । 

अभियुक्त मीरा दम्पत्ति भारतको बिहार राज्य अन्तर्गत सुपौल जिल्लाको निर्मली थानास्थित मझारी ग्रामका बासिन्दा रहेको खुलेको छ । तर उनीहरूले सप्तरीको हाल डाक्नेश्वरी नगरपालिका-६ (साविक औरही गाविस वडा नम्बर–३) ठेगाना भएको झुठो विवरण देखाएर नागरिकता प्रमाणपत्र लिएको पाइएको छ । प्रहरीका अनुसार भारतको निर्वाचन नामावली २०२२ मा महेन्द्रकुमार बिहार राज्यको क्रम संख्या ६३२ र मीरा ६३३ क्रम संख्या रहेको विवरण खुलेको छ । 

यो पनि पढ्नुहोस