डकैती मुद्दामा वडाध्यक्ष मुद्दा पुर्पक्षका लागि जेल चलान

२१ साउन, काठमाडौं । रकम लुटपाट र डकैती मुद्दामा सुर्खेतको वीरेन्द्रनगर नगरपालिका–३ का वडाअध्यक्ष विनोदसिंह विष्टलाई मुद्दा पुर्पक्षका लागि जेल चलान  गरिएको छ । 

गएको असार १४ मा लुटपाट अभियोगमा वीरेन्द्रनगर नगरपालिकाको कार्यालयबाट पक्राउ परेका विष्टलाई जिल्ला अदालत सुर्खेतले आइतबार सुनसवाइपछि जेल चलान गर्न आदेश दिएको हो । आदेशसँगै प्रहरीले सुर्खेत कारागार पठाएको छ । तत्काल प्राप्त सबुदका आधारमा विष्टलाई रिहा गर्न नमिल्ने ठहरसहित जेल चलान गरिएकाे हाे ।

लुटपाटमा संलग्न अन्य सुशील गुरुङ र बलिराज शाहीलाई भने अदालतले जनही दुई/दुई लाख रुपैयाँ धरौटी लिएर तारेखमा छाडेको छ । 

उनीहरुले खोर्के खोला तटबन्ध उपभोक्ता समितिको साढे ६ लाख रूपैयाँ लुटेको आरोप छ । विष्टले भने आरोप अस्वीकार गर्दै आएका छन् । ३ जनाको समूह मिलेर लुटपाट गरेको सकुरमा डकैती मुद्दा लाग्ने कानूनी व्यवस्था छ ।