नक्कली सर्टिफिकेट प्रकरणको इफेक्टः भारतीय मेडिकल कलेज अनुगमन गर्न विज्ञ टोली पठाइँदै

२८ साउन, काठमाडौं । केही चिकित्सकमा भेटिएका नक्कली शैक्षिक प्रमाणपत्रका कारण स्वास्थ्य क्षेत्रमा नकारात्मक सन्देश फैलिँदो छ । चिकित्सक कर्ममा रहेर सांसद पदमा निर्वाचित व्यक्ति नै यस प्रकरणमा तानिएपछि सरकार सूक्ष्म अध्ययनमा लागेको छ ।

प्रकरणमा नेपाली कांग्रेसका सांसद डा. सुनील शर्मामाथि उनले भारतका कलेजबाट हासिल गरेका भनिएका प्रविणता प्रमाणपत्र तहको सर्टिफिकेटमाथि ‘नक्कली’ भएको उजुरीका आधारमा प्रहरीले अनुसन्धान जारी राखेको छ । शर्मा जिल्ला अदालत काठमाडाैंबाट साधारण तारेखमा छुटेपनि अन्य ६ चिकित्सक समेत पक्राउ परेका छन् । उनीहरू प्रहरीको हिरासतमा छन् । पक्राउ पर्नेमा निजी क्षेत्रको सुमेरु अस्पताल र सरकार स्वामित्वको शिक्षण अस्पताल महाराजगन्जका कार्यरत चिकित्सक समेत रहेका छन् ।

त्यस क्रममा नेपाल स्वास्थ्य व्यवसायी परिषदले भारतीय मेडिकल कलेज तथा शिक्षालयहरूको अनुगमनको लागि टोली पठाउने भएको छ ।  सीमावर्ती क्षेत्र भारतको विहारमा पछिल्लो समय खुल्दै आएका मेडिकल कलेज तथा शिक्षालयहरूमा धेरै नेपाली विद्यार्थी पढ्दै आएका छन् । त्यहाँका कलेजहरूमा अध्ययन गरेर आएका धेरैले चिकित्सक लाइसेन्सका लागि परिषदमा आवेदन दिएका छन् ।

तर उनीहरूले बुझाएका प्रमाण-पत्रमाथि आशंका पैदा भएपछि लाइसेन्स दिन रोकेर परिषदले भारतीय कलेजहरूको अनुगमनको लागि विज्ञ टोली पठाउने तयारी गरेको हो । अनुगमनका लागि पठाउन टोली गठन भइसकेको परिषदका रजिष्ट्रार लीलानाथ भण्डारीले बताए । भारतका बिहार, राजस्थान, गुजरातका विश्वविद्यालयहरूबाट मेडिकल कलेज अनुगमनका लागि पत्राचार प्राप्त भइसकेको परिषदको दाबी छ ।