सशस्त्र प्रहरी एसपी सुमन थपलियाको मृत्यु

२ भदौ, वीरगन्ज । पर्सामा कार्यरत सशस्त्र प्रहरी उपरीक्षक सुमन थपलियाको मृत्यु भएको छ । वीरगन्जस्थित सशस्त्र प्रहरी बल नेपाल नम्बर १३ गणका प्रमुख प्रहरी उपरीक्षक 'एसपी' ४४ वर्षीय सुमन थपलियाको शनिबार निधन भएको हो ।

वीरगन्जस्थित बयोधा मेडिसिटी अस्पतालमा उपचारका क्रममा शनिबार दिउँसो १ बजेतिर उनको निधन भएको हाे । उनको हृदयाघात 'हार्ट अट्याक'बाट मृत्यु भएको अस्पतालले जनाएको छ । शनिबार बिहान ११ बजेतिर गण परिसरमै रहेको आवासमा रहेका बेला  थपलिया अचानक अचेत भएर लडेका थिए ।

लगत्तै उनलाई उपचारका लागि बयोधा मेडिसिटी अस्पतालमा लगिएको थियो । नुवाकोटका स्थायीवासी रहेका थपलियाको काठमाडौंमा पनि घर छ ।

यसैबीच, थपलियाको निधन प्रति पूर्व मन्त्री एवम् पर्सा निर्वाचन क्षेत्र नम्बर १ का सांसद प्रदीप यादव र वीरगञ्ज महानगरका मेयर राजेशमान सिंहले समवेदना प्रकट गरेका छन् । सामाजिक सञ्जाल मार्फत सांसद यादव र मेयर सिंहले थपलियाको निधन प्रति समवेदना प्रकट गरेका हुन् ।