विश्वासको मतका लागि एमाले र राप्रपालाई मुख्यमन्त्री थापाले पठाए पत्र

३ भदौ, काठमाडौं । कोशीका मुख्यमन्त्री उद्वव थापाले आफुलाई विश्वासको मत दिन प्रदेशसभका प्रमुख विपक्षी नेकपा (एमाले) र  विपक्षी राप्रपालाई पत्र पठाएका छन् । 

भोलि सोमबार बस्ने प्रदेशसभा बैठकमा मुख्यमन्त्री थापाले विश्वासको मत लिँदैछन् । बैठकमा उनले विश्वासको मत लिने प्रस्ताव पेस गर्नेछन् । सो प्रस्तावको पक्षमा मत दिन उनले आइतबार दुवै पार्टीलाई पत्र पठाएका हुन् । विपक्षमा दुई पार्टी मात्र छन् । बाँकी चार दल सरकार साझेदार छन् । 

मुख्यमन्त्री थापाले मत माग्दै पत्र पठाएको एमालेका प्रमुख सचेतक रेवतीरमणले पुष्टि गरे । एमाले र र राप्रपाले थापालाई मत दिने पक्कापक्की छ । विश्वासको मत पाउन नसकेकै कारण यसअघिका एमाले नेतृत्वको सरकार ढलेको थियो । 

प्रदेश सभामा काङ्ग्रेस २९, माओवादी १३, एकीकृत समाजवादी ४ र जसपा १ गरि सत्ता पक्षसग ४७ मत छ । मुख्यमन्त्री पद बचाउन थापालाई  ४७ मत आवश्यक पर्छ । विपक्षमा एमालेको ४० (उपसभामुखसहित)  र राप्रपाको ६ गरी ४६ मत छ । सभामुख पद रिक्त छ । यस्तो अवस्थामा एमालेले उपसभामुख सिर्जना दनुवारलाई बैठकमा अनुपस्थित गराउने र विश्वासको मत लिने प्रक्रिया प्रभावित तुल्याउने रणनीतिमा लागेको बताइएको छ ।