वायुसेवा संचालक संघले गर्यो प्राधिकरणको नयाँ निर्देशिकाको स्वागत

३ भदौ, काठमाडौं । नागरिक उड्डयन प्राधिकरणले दुर्गम गन्तव्यमा उडान सुचारु गर्ने गरी ल्याएको निर्देशिकाको वायुसेवा संचालक संघले स्वागत गरेको छ । 

करिब एक महिनायता प्राधिकरणले जारी गरेको बर्खे मापदण्ड ल्याएर दिउँसो १२ बजेपछि पहाडी क्षेत्रमा एयरपोर्टमा उडानमा रोक लगाएको थियो । त्यसलाई पर्यटन मन्त्री सुदन किरातीको योजनामा उडान सुचारु हुने गरी निर्देशिका ल्याइएको हो । जसलाई संघले आइतबार एक प्रेस विज्ञप्ति निकालेर स्वागतयोग्य कदम भनेको छ । उडान सुरक्षामा संघ सचेत रहेको समेत जनाइएको छ । 

‘हामी हवाई उडान सुरक्षामा कुनै कमी कमजोरी हुन नदिन पूर्ण रुपमा सचेत छौं। हवाई उडान संचालन गर्दा भविष्यमा आइपर्ने विविध कठिनाइका विषयहरुमा समेत आवश्यक छलफल तथा सहकार्य गर्दै निरन्तर अगाडि बढ्ने छौं,’ जारी विज्ञप्तिमा उल्लेख छ ।

प्राधिकरणले कर्णालीसहित पहाडी तथा तराई समेतका दुर्गम क्षेत्रमा हवाई सेवा प्रदान गर्न नयाँ सुरक्षा निर्देशिका जारी गरेको हो । उडान नहुँदा हुम्लामा मात्र साउन महिनामा ४ बिरामी बालकले ज्यान गुमाएका थिए । त्यसपछि कर्णाली प्रदेश सरकारले केन्द्रका पर्यटन मन्त्रालयसँग उडान सुचारुका लागि पहल गर्न प्रदेशसभा बैठकमा समेत सांसदहरुले आवाज उठाएका थिए ।