उपसभामुखले बिरामी परेको कलाविहीन नाटक गर्नुभो : नेता आङबो

४ भदौ, काठमाडौं । कोशी प्रदेशसभाका सदस्य एवं नेकपा (माओवादी केन्द्र)को संसदीय दलका नेता ईन्द्रबहादुर आङ्बो उपसभामुख सिर्जना दनुवारले बिरामी परेको कलाविहीन नाटक रचेको आरोप लगाएका छन् । 

सोमबार जारी कोशी प्रदेशसभाको बैठकमा मुख्यमन्त्री उद्वव थापाले पेस गरेका विश्वासको मत लिनेसम्बन्धी प्रस्तावमाथि दलको तर्फबाट धारणा राख्दै नेता आङबोले उपसभामुख दनुवार आफैंले बैठक बोलाएर बिरामीको नाटक गरेर अनुपस्थित रहेको आरोप लगाए । 

मुख्यमन्त्री थापालाइ विश्वासकाे मत पुग्नबाट राेक्न दनुवारले ९ जना सदस्यकाे बिदा स्वीकृत गरेर गलत परम्पराकाे सुरूवात गरेकाे उनले बताए । 

मुख्यमन्त्री थापाले विश्वासको मत पाउन ४७ सांसदको समर्थन चाहिन्छ । थापाको पक्षमा कांग्रेस, माओवादी केन्द्र, एकीकृत समाजवादी र जसपाका गरी ४७ सांसद उभिएका छन् । सभामुख पद रिक्त र उपसभामुख अनुपस्थित रहेपछि सभाका अध्यक्ष मण्डलका सदस्य कांग्रेसका स्माइल मन्सुरीले बैठक संचालन गरिरहेका छन् । 

एमालेले भने बैठकमा उपसभामुख दनुवार स्वास्थ्योपचारका लागि काठमाडौं गएको र त्यसमा असहष्णु टिप्पणी गर्नु राजनीतिक संस्कार नभएको बताए । 

९३ सदस्यीय रहेकाे प्रदेशसभामा एमालेसँग ४० (उपसभामुखसहित) र राप्रपासँग ६ गरी ४६ मत छन् ।

यो पनि पढ्नुहोस