मलाई कसैसँग टक्कर गर्नु छैन, प्रदेशलाई सरकार विहीनताबाट जोगाउनुछ : मुख्यमन्त्री थापा

४ भदौ, काठमाडौं । कोशी प्रदेशका मुख्यमन्त्री उद्वव थापाले आफू कसैसँग टक्कर गर्ने पक्षमा नरहेको बताएका छन् । सोमबार जारी प्रदेशसभाको बैठकमा विभिन्न राजनीतिक दलका नेताहरुले उठाएका प्रश्नको जवाफ दिँदै यस्तो बताएका छन् । 

बैठकमा उनले विश्वासको मत लिने प्रस्ताव पेस गरेका छन् । प्रस्तावमाथि सरकार साझेदार दल कांग्रेस, माओवादी केन्द्र, जसपा, र एकीकृत समाजवादीले विश्वासको मत दिने घोषणा गरेका छने । प्रमुख प्रतिपक्ष एमाले र प्रतिपक्षी राप्रपाले मत नदिने घोषणा गरेका छन् । विश्वासको मत पाउन ४७ सांसदको समर्थन आवश्यक पर्छ । थापाको पक्षमा बैठकका अध्यक्षसहित ४७ खुलेका छन् । 

एमाले र राप्रपासँग ४६ मत छन् । दुई पार्टीका ९ सांसद बिदामा बसेका छन् । उपसभामुख सिर्जना दनुवार आज बिहान मात्र स्वास्थ्योपचारका लागि भन्दै काठमाडौं आएकी छन् । उनलाई गंगालाल हृदय रोग केन्द्र बाँसबारीमा भर्ना गरिएको छ । तर सत्ता पक्षका सांसदहरुले भने बिरामीको ‘नाटक’ गरेको भन्दै आलोचना गरेका छन् । 

थापाको प्रस्तावमाथि अहिले मत विभाजनको प्रक्रिया सुरु भएको छ । सांसदहरु पक्ष र विपक्षमा मत दिन लाइन लागेका छन् ।

थापा गएकाे साउन १६ मा चार दलका ४७ सांसदकाे समर्थनमा मुख्यमन्त्री नियुक्त भएका थिए । उनलाइ यही भदाै १३ गतेभित्र प्रदेशसभाबाट विश्वासकाे मत लिनु पर्ने संवैधानिक बाध्यता छ ।

यो पनि पढ्नुहोस