मुख्यमन्त्री थापाले पाए विश्वासको मत, पक्षमा ४७ र विपक्षमा ३० मत

४ भदौ, काठमाडौं । कोशी प्रदेशका मुख्यमन्त्री उद्धव थापाले विश्वासको मत प्राप्त गरेका छन् । गएको साउन १३ मा मुख्यमन्त्री नियुक्त भएको उनले सोमबार बसेको प्रदेशसभाको बैठकमा आफूमाथि प्रदेशसभाको विश्वास भन्ने सिद्ध गर्न विश्वासको मतको प्रस्ताव पेस गरेका थिए । 

सो प्रस्तावमाथि सभाअध्यक्ष स्माइल मन्सुरीले मत विभाजन प्रक्रियाबाट निणर्याथ प्रस्तुत गरेका थिए । जसमा प्रस्तावको पक्षमा ४७  र विपक्षमा ३० मत मत परेका थिए । ९३ सदस्य रहेको प्रदेशसभाको आजको बैठकमा ७७ सांसद उपस्थित भएका थिए ।

उपस्थितमध्ये पक्षमा खसेको ४७ मत मुख्यमन्त्रीले राखेको विश्वासको मत लिने प्रस्तावमा बहुमत भएको र थापाले बहुमत प्राप्त गरेको घोषणा बैठकमा अध्यक्ष स्माइल मन्सुरीले गरे । मत दिन्न भन्ने पक्षमा मत परेन ।