‘बागेश्वर बाबा’ले राष्ट्रिय अस्मिताविरुद्ध गतिविधि गरिरहेको भन्दै देश निकाला गर्न माग

५ भदौ, काठमाडौं । नेपालमा रहेका भारतका  एक धार्मिक भीरुले मुलुकको अस्मिताविरुद्ध गतिविधि गरिरहेको भन्दै राष्ट्रियसभा बैडकमा सांसदहरुले देश तत्काल निकाला गर्न माग गरेका छन् ।

एमालेका सांसद देवेन्द्र दाहालले बैठकको शून्य समयमा बोल्दै गत हप्ता धार्मिक निम्तोमा नवलपरासी आएका भारतको बागेश्वर धामका ‘बागेश्वर  बाबा’को नामले चिनिने धीरेन्द्र कृष्ण शास्त्रीले धार्मिक चलखेल बढाएको र ‘नेपाल भारतको अंग’ भएको राष्ट्रियताविरोधी अभिव्यक्ति दिएको भन्दै उनले आपत्ति जनाए । 

शास्त्रीलाई तत्काल देशबाट निकाला गर्न उनले सरकारसँग माग गरे । नवलपरासीका व्यापारी बरुण चौधरीको निमन्त्रणामा भदौ २ देखि ४ गतेसम्म नवलपरासीस्थित शाश्वतधाममा हनुमन्त कथा वाचन गर्न शास्त्री नेपाल आएका हुन । 

उनी पछिल्लो समयमा चितवन पुगेका छन् । शास्त्री भारतमा विवादस्पद व्यक्ति मानिन्छन् । उनले धर्मको नाममा ठगी धन्दा चलाएको र नेपाल आएर पनि धन्दा चलाउने काम गरेको उनले बताए । शास्त्री भारतको ‘रअ’का एजेन्ट रहेको र धार्मिक भीरु बनेर नेपालको अस्मितामाथि नै आँच पुग्ने षडयन्त्र गरिरहेको उनले बताए ।

विवादस्पद धार्मिक व्यक्तिलाई होटलमा पुगेर सरकारका मन्त्रीहरुले भेट गरेको समेत उनको दाबी छ । उनले शास्त्रीलाई पशुपति मन्दिरमा प्रवेश दिएकोमा पनि आपत्ति जनाए । ‘विवादस्पद छबिका धार्मिक व्यक्तिलाई हिन्दूहरुको पवित्र मन्दिर पशुपतिनाथ मन्दिरमा किन छिर्न दिइयो ?’ उनले प्रश्न गरे ।

बैठकमा सांसदहरूले बाढी पहिरोले पुर्याएको क्षति, लम्पि स्किन रोग लगायत समसमायिक विषय बोल्ने क्रम जारी छ ।