किसानलाई बेवास्ता गरे हामी सकिन्छौं : डा. शेखर कोइराला

६ भदौ, काठमाडौं । नेपाली कांग्रेसका वरिष्ठ नेता तथा संघीय सभासद डा. शेखर कोइरालाले किसानलाई वेवास्ता गर्ने राजनीतिक दलको भविष्य समाप्त हुने बताएका छन् । बुधबार कोइराला निवास विराटनगरमा नेपाल किसान महासंघ कोशी प्रदेशको नव नियुक्त पदाधिकारीहरू र सदस्यहरूको भेटमा उक्त कुरा बताएका हुन ।

वरिष्ठ नेता डा. शेखर कोइरालाले नेपाली कांग्रेसले सबै भातृ तथा सुबेच्छुक संस्थालाई चलायमान गराउन आवश्यक रहेको बताउँदै नेपाल किसान महासंघले कोशी प्रदेशमा सञ्चालन गरिरहेका गतिविधिहरुलाई आफुले नजिकबाट नियालीरहेको बताउँदै किसानका समस्यामा  नेपाल किसान महासंघ कोशी प्रदेश तदर्थ समितिलाई खरो रुपमा उत्रन निर्देशन समेत दिएका छन् ।

नेपाल कृषि प्रधान मुलुक हो, हामी किसानका नेता हौ, किसानका सवालमा नेपाली कांग्रेसले कहिल्यै कसैसँग कुनै प्रकारको कम्परमाईज नगर्ने बताउँदै कांग्रेस वरिष्ठ नेता डा. कोइरालाले कोशी प्रदेश तदर्थ समितिलाई सफल कार्यकालको शुभकामना समेत दिएका छन् । 

भेटमा नेपाल किसान महासंघका कोशी प्रदेश तदर्थ समितिका अध्यक्ष राजेन्द्र भट्टराईले पार्टीले आफ्ना भातृ संस्थाहरूलाई अझै पनि उचित सहभागिता र चलायमान गराउन नसकेको गुनासो व्यक्त गरेका थिए । भट्टराईले किसानका समस्या सम्बोधन गर्न सक्ने हो भने नेपाली कांग्रेसको संगठन आफै दह्रो हुने भएकोले पार्टीले नेपाल किसान महासंघले उठाएका जायज माग समाधान गराउन पहल गरिदिनु पर्ने धारणा व्यक्त गरेका थिए ।

नेता डा. कोइरालासँगको भेटमा नेपाल किसान महासंघ कोशी प्रदेश सचिव यज्ञप्रसाद भट्टराईले किसानका सवाल कांग्रेसको सवाल हुनुपर्ने बिचार राखेका थिए । नेपाल किसान महासंघ मोरंग जिल्ला तदर्थ समितिका अध्यक्ष वसन्त हुमागाँईले समिति गठन पश्चात् महांघले मोरंगमा सञ्चालन गरेका विविध गतिविधिहरूका विषयमा जानकारी गराएका थिए ।