एमाले र राप्रपाले गरे कोशी प्रदेशसभा बैठक बहिष्कार

६ भदौ, काठमाडौं । कोशी प्रदेशसभाको बैठक स्थगित भएको छ । उपसभामुख सिर्जना दनुवारको अनुपस्थितिमा ज्येष्ठ सदस्य इस्राइल मन्सुरीले बैठक संचालन भएको जानकारी दिए लगत्तै प्रतिपक्षी दल नेकपा (एमाले) र राप्रपाका सांसदहरुले उठेर विरोध गर्दै बैठक छाडेर बाहिरिएपछि बैठक अनिश्चितका लागि स्थगित भएको हो । 

आजको बैठकमा प्रदेश निजामती  सेवा ऐन २०७९  लाई संसोधन गर्न बनेको विधेयक र  स्थानीय सेवाको गठन सञ्चालन र सेवाका सर्तहरु सम्बन्धमा व्यवस्था गर्न बनेको विधेयक प्रदेशसभामा पेश गर्ने कार्यसूची थियो ।

भदौ ४ गते मुख्यमन्त्री उद्वव थापाले विश्वासको मत लिँदा मन्सुरीले बैठक संचालन गरिरहेका अवस्थामा मत दिएर असंवैधानिक कदम चालेको भन्दै एमाले र राप्रपाले बैठक बहिष्कार गरेका छन् । 

दुवै दलका सांसदहरुले सभाध्यक्ष मन्सुरीविरुद्ध नाराबाजी समेत गरेका थिए । प्रतिपक्षको कुर्सी खाली भएपछि सभाध्यक्ष मन्सुरीले अर्को सूचना जारी नभएसम्मका लागि बैठक स्थगित गरिएको जानकारी दिए ।

एमालेले मुख्यमन्त्रीको विश्वासको मत बदरको माग गर्दै सर्वोच्च अदालतमा मुद्दा दायर गराउने तयारी गरेको छ ।