गौरा पर्वमा सार्वजनिक बिदा दिने प्रधानमन्त्रीको प्रतिवद्धता

७ भदौ, काठमाडौं । प्रधानमन्त्री पुष्पकमल दाहाल ‘प्रचण्ड’ले गौरा पर्वमा सार्वजनिक बिदा दिन आफू सकारात्मक रहेको बताएका छन् ।

मुख्यगरी सूदुरपश्चिममा मनाइने गौरा पर्वको अवसरमा आज काठमाडौंको टुँडिखेलमा आयोजित कार्यक्रममा प्रधानमन्त्री प्रचण्डले गौरा पर्वको तिथि किटान भए त्यसदिन सार्वजनिक बिदा दिने प्रतिवद्धता व्यक्त गरे । 

साथै उनले पर्वलाई आगामी वर्षदेखि राष्ट्रिय पर्वको रूपमा मनाउने घोषणा समेत गरेका छन् । ‘गौरा पर्वको तिथि किटान होस्, सरकारका तर्फबाट सार्वजनिक बिदा दिने व्यवस्था मिलाउन पहल गर्नेछु,’ उनले भने । 

काठमाडौं उपत्यकामा बसोबास गर्दै आइरहेका सुदूरपश्चिमेलीहरुले आज टुँडिखेलमा विशेष कार्यक्रम आयोजना गौरा पर्व मनाएका छन् । उनीहरुले पर्वको अवसरमा शुभकामना आदानप्रदान गरेका छन् ।

सुदूरपश्चिम प्रदेश सरकारले भने आज प्रदेशभर सार्वजकि बिदा दिएको छ ।