प्रहरी निरीक्षकमाथि बञ्चरो प्रहार गर्नेहरुको परिचय खुल्यो

८ भदौ, काठमाडौं। गएराति झापाको पूर्वपश्चिम राजमार्गस्थित झरना खोलानजिक नियमित सवारी जाँचमा खटिएका प्रहरी निरीक्षक (इन्स्पेक्टर) युवराज कटुवालमाथि बञ्चरो प्रहार गर्ने समूहमा संलग्नहरुको पहिचान खुलेको छ । 

मापसे गरी ३ जना चढेर आइरहेका मोटरसाइकललाई रोक्ने क्रममा एक जनाले ओर्लेर निरीक्षक कटुवालमाथि बञ्चरो प्रहार गरेका थिए । टाउको र हातमा गहिरो चोट लागेको कटुवालको  बिर्तामोडको बिएण्डसी अस्पतालमा उपचार गराइरहेको छ । 

प्रहरीले मोटरसाइलकसहित तीन जनालाई नै पक्राउ गरिएको बताएपछि उनीहरुको परिचय खुलाएको थिएन । बिहीबार मात्र उनीहरुको परिचय बाहिर ल्याइएको छ । जसअनुसार झापाको शिवसताक्षी नगरपालिका–९ बस्ने ३६ वर्षीय अशोक पोखरेल, ३२ वर्षीय अरूण तामाङ र ३३ वर्षीय लक्ष्मण टुडु रहेको प्रहरीले जनाएको छ । 

मोटरसाइकलमा सवार भएका उनीहरुले मादक पदार्थ (मापसे) र लागू औषध सेवन गरेको पाइएको छ ।उनीहरुको साथबाट लागू औषध ब्राउनसुगर जस्तो देखिने पदार्थ १ सय मिलिग्राम बरामद भएको समेत प्रहरीको दाबी छ । अभियुक्तहरूलाई आजै सार्वजनिक गरिने भएकाे छ ।

घटनाको अनुसन्धान जिल्ला प्रहरी कार्यालय झापाको विशेष टोली खटिएको बताइएको छ ।