शिशु बिक्री गरेको आरोप लागेका चिकित्सक कर्णविरुद्ध संगठित अपराधमा पनि मुद्दा चलाइँदै

११ भदौ, काठमाडौं । मोरङ विराटनगरस्थित ग्रिनक्रस अस्पतालका चिकित्सक तपेश्वरलाल कर्णलाई मानव बेचबिखन साथै संगठिन अपराध कसुरमा पनि मुद्दा चलाउने भएको छ । भोजपुरकी एक युवतीले प्रेमीसँगको यौन सम्बन्धनबाट गत असारमा अस्पतालमा जन्म दिएकी शिशु (छोरी)लाई प्रेमी गोविन्द्र राईको सल्लाहमा जन्मनेबित्तिकै मोरङका निसन्तान रहेका सूर्यनारायण राजवंशीलाई पाँच लाख रुपैयाँ बिक्री गरेको पाइएको थियो । 

चिकित्सक कर्णले अस्पतालका आफ्ना कर्मचारी सुधा रावंशीमार्फत ग्राहक खोज्न लगाएर दिलयामा राजवंशीका छोरा सूर्यबहादुर दम्पत्तिलाई बिक्री गरेका थिए । आफ्ना छोरी अस्पतालबाटै गायब बनाइएपछि सुत्केरी आमाले साउन अन्तिम साता मोरङ प्रहरीमा उजुरी दिएपछि खोजीका क्रममा कर्ण, गोविन्द, सूर्यनारायण, सुधा, दिलमायासहित पाँच जनालाई पक्राउ गरी अनुसन्धान जारी राखेको छ ।

सुरुमा पाँचै जनाविरुद्ध शिशु बेपत्ता र मानव बेचबिखन कसुरमा मात्र अनुसन्धान गरिएपनि घटनाको प्रकृतिलाई हेरेर संगठित अपराध गरेको निष्कर्षसहित संगठित अपराध कसुरमा पनि अनुसन्धान सकेर मुद्दा चलाउने तयारी गरेको हो । 

संगठित अपराधमा अनुसन्धान गर्न ६० दिनसम्म हिरासतमा राख्न पाइने व्यवस्था छ । अपराधिक घटना (वरदात)मा ३ जनाभन्दा व्यक्ति संलग्न रहेको अवस्थामा संगठित अपराध कसुर लाग्ने फौजदारी ऐनको व्यवस्था छ । 

करिब डेढ महिनापछि सकुशल उद्धार गरिएकी शिशुलाई आमाको जिम्मा लगाइसकिएको छ । अस्पतालमा डेलिभरी गराएबापत कर्णले गोविन्द्रसँग ३५ हजार रुपैयाँ छुट्टै शुल्क लिएका थिए ।