स्वचालित पेशी तारेख प्रणालीको सुरुवातले अदालतमा विचौलियाको प्रवेश अन्त्य भएको छः प्रधानन्यायाधीश

११ भदौ, काठमाडौं । प्रधानन्यायाधीश विश्वभरप्रसाद श्रेष्ठले सर्वोच्च अदालतमा सुधारको प्रक्रिया अघि बढेको बताएका छन् । सोमबार स्वचालित पेशी तारेख प्रणालीको सुरुवात गर्दै उनले अब कर्मचारी र सेवाग्राही निश्चिन्त हुने बताए । यसबाट तारेख र पेसीमा विगतदेखि बिचौलियाहरुले चलखेल र प्रभावको अन्त्य भएको उनको भनाइ छ । 

प्रधानन्यायाधीश श्रेष्ठले भने, ‘यसले कर्मचारीहरूलाई निश्चिन्तता हुने, सेवाग्राहीहरुलाई पनि निश्चिन्तता हुने परिस्थिति बनेको छ । अदालत अब सुधारको प्रक्रियामा अगाडि बढेको छ । यो पेशी व्यवस्थापन कडी हो । यसले तारेखसम्म सुधार गर्छ । अब सायद हाम्रो कर्मचारी साथीहरूले कसैको प्रभावमा नपरी निर्धक्कसँग उच्च मनोबल राखेर काम गर्नलाई यसले मद्दत गरेको छ ।’ 

पेशी तारिख अब प्रविधिमा आबद्ध भएकाले सुशासन कायम गर्न पनि यसले मद्दत गर्ने प्रधानन्यायाधीश श्रेष्ठले बताए । उनले स्वचालित पेशी तारिख प्रणालीका लागि सर्वोच्च अदालत भित्रैको जनशक्ति प्रयोग गरिएको पनि जानकारी दिए । आजदेखि सर्वोच्च अदालतमा सुरु भएको पेसी तारिख अटोमेसनको शुभारम्भपछि सञ्चारकर्मीसँग दिएको प्रतिक्रियामा प्रधानन्यायाधीश श्रेष्ठले न्यायिक सुशासन प्रारम्भ भएको बताए । 

पेसी तारिख अटोमेसन सञ्चालनका लागि काम गरेका न्यायाधीशद्वय अनिलकुमार सिन्हा र नहकुल सुवेदीसहित आइटी टिममा बसेर काम गरेकाहरूलाई प्रधानन्यायाधीश श्रेष्ठले धन्यवाद दिए । उनले सर्वोच्चको आफ्नो जनशक्तिबाटै सफ्टवेयर निर्माण भएको भन्दै भोलिका दिनमा कुनै समस्या आएमा समाधान हुने बताए ।

पेसी तारिख व्यवस्थापनसँगै कर्मचारीले आफू निकटका लागि अनुकूलमा अगाडि-पछाडि पेसी सारिदिने र कर्मचारी प्रशासनमा पहुँच नहुनेहरूलाई प्रतिकूल हुने अवस्थाको अन्त्य हुने विश्वास गरिएको छ । अब सेवाग्राहीले ल्याएको रिट निवेदन-पुनरावेदन निवेदनसहितका मुद्दामा दर्तासँगै स्वतः पेसी-तारिखको मिति पाउनेछन्, उनले भने ।