हवाइ सुरक्षा नियम उल्लंघनमा सिम्रिक एयरका अध्यक्ष थापालाई १० हजार जरिवाना

११ भदौ, काठमाडौं । नेपाल नागरिक उड्डयन प्राधिकरण (क्यान)ले सिम्रिक एयर प्रालिका अध्यक्ष रामेश्वर थापालाई १० हजार रूपैयाँ जरिवाना तिराउने निर्णय गरेको छ ।

प्राधिकरणको नियम र कानुन पटक पटक उल्लंघन गरेर प्राधिकरणको काममा बाधा पुर्‍याएको जनाउँदै जरिवाना गर्ने निर्णय गरेको हो । नेपाल नागरिक उड्डयन प्राधिकरण ऐन,२०५३ को दफा २५ को उपदफा २ बमोजिम उक्त जरिवाना भएको क्यानले सोमबार जनाएको छ । 

हवाई सुरक्षासम्बन्धी निर्देशनमा नियम र कानुन उल्लंघन गरेको घटनामा सचेत गराउँदै उल्टै सञ्चारमाध्यममार्फत दुष्प्रचार गरेर नागरिकमा भ्रम छरेको प्राधिकरणको निष्कर्ष छ ।

जरिवानापछि पनि नियम पालना गर्न अटेर गरे सिम्रिक एयरका सबै उडान बन्द गर्ने चेतावनी दिइएको छ । दैनिक पत्रिका समेत संचालन गरिरहेका थापाले क्यानको सुरक्षा निर्देशनको उल्लंघन घटनामा सोधिएको स्पष्टीकरण पत्रको जवाफ क्यानलाई दिएका थिएनन् ।