पाकिस्तानविरुद्ध नेपालको फिल्डिङ: live

१२ भदौ, काठमाडौं । एसिया कपमा नेपालले पाकिस्तानविरुद्ध पहिले फिल्डिङ गरेको छ । टस जितेको पाकिस्तानले पहिले ब्याटिङ रोजेपछि नेपालले फिल्डिङ गरेको हो ।  कप्तान बाबार आजमले टस जितेपछि घरेलु टोली पाकिस्तानले मुल्तान क्रिकेट रंगशालामा नेपाललाई फिल्डिङका लागि बोलाएको हो ।

प्रतियोगितामा सुरुआती खेल भएकाले आफूहरुले ब्याटिङ गर्न खोजेको आजमले बताए । एकदिवसीय अन्तर्राष्ट्रिय क्रिकेटको पछिल्लो र्‍याङ्‌किङमा पाकिस्तान विश्व नम्बर एक टोली हो भने नेपाल १५ औं स्थानमा छ ।

पाकिस्तानले अघिल्लो दिन नै आफ्नो प्लेयिङ ११ को घोषणा गरेको थियो । पाकिस्तानको पूर्ण टोली रहेको छ । बाबर आजमको कप्तानीमा रहने पाकिस्तानी टोलीमा इमाम उल हक, फखर जमान, मोहम्मद रिजवान, सलमान अली अगा, इफ्तिखार अहमद, नसिम शाह, सहिद शाह अफ्रिदी र हरिस राउत रहेका छन् ।

श्रीलंकामा अफगानिस्तानविरुद्ध तेस्रो तथा अन्तिम एकदिवसीय खेलमा खेलेको टोलीबाट पाकिस्तानले नसिम शाह, हरिस राउत, साउद शकिल, मोहम्मद वासिम जुनियर र फहिम असरफलाई बाहिर राखेको छ ।

नेपालबाट कप्तान रोहित पौडेल आफैं तेस्रो नम्बरमा ब्याटिङ गर्नेछन् । भिम सार्कीलाई टोली बाहिर राखिएको छ । रोहितले यसअघि चौथो नम्बरमा ब्याटिङ गर्दै आएका थिए ।

नेपाली टोलीमा रोहित पौडेल ९कप्तान०, आसिफ शेख, कुशल भुर्तेल, आरिफ शेख, कुशल मल्ल, दीपेन्द्रसिंह ऐरी, गुल्शन झा, करण केसी, सोमपाल कामी, सन्दीप लामिछाने र ललित राजवंशी रहेका छन् ।

एसिया कप क्रिकेटमा नेपालको यो पहिलो खेल हो । अप्रिलमा काठमाडौंमा भएका एसीसी प्रिमियर कप जितेर नेपाल पहिलो पटक एसिया कपका लागि छनोट भएको थियो । समूह ‘ए’ मा रहेको नेपालले सोमबार श्रीलंकाको क्यान्डीमा भारतसँग खेल्ने छ ।