स्वीमिङ पुलमा करेन्ट लागेर गम्भीर घाइते भएका शाक्यको भेन्टिलेटरमा राखेर उपचार हुँदै

१७ भदौ, ललितपुर । गत शुक्रबार पुल्चोकस्थित होटल स्क्वायरको स्वीमिङ पुलमा करेन्ट लागेर गम्भीर घाइते भएका ४१ वर्षीय सजिलमान शाक्यको मेडिसिटी अस्पतालमा उपचार भइरहेको छ । 

दिउँसो २ बजेतिर पौडी खेलेर निस्कने क्रममा उनलाई करेन्ट लागेको थियो । गम्भीर घाइते भएका उनलाई भेन्टिलेटरमा राखेर उपचार गराइरहेको परिवारका सदस्यले जनाएका छन् । स्वीमिङ पुलमा तापक्रम मिलाउन करेन्ट जडान गरिएको पाइएको छ । 

स्वीमिङ पुलमा कसरी करेन्ट लाग्ने भन्ने बारे अनुसन्धान भइरहेको जिल्ला प्रहरी परिसर, ललितपुरले जनाएको छ । होटल संचालकले भने स्वीमिङ पुलमा कुनै लिकेज वा करेन्टको फ्लो नभएको दाबी गर्दै आएको छ ।