ललितानिवास जग्गा प्रकरण : सरकारी वकिलको बहस सकिएपछि आज ३ प्रतिवादीका वकिलले गरे बहस

१८ भदौ, काठमाडौं । बालुवाटारस्थित सरकारी स्वामित्वको ललिता निवासभित्रको सरकारी जग्गा हिनामिना प्रकरणमा ३ सयभन्दा बढीलाई प्रतिवादी बनाएर काठमाडौं जिल्ला अदालतमा दर्ता भएको मुद्दामा सोमबार सरकारी वकिलको तर्फबाट बस सकिएको छ । आइतबार र सोमबार दुई दिन सरकारी वकिलहरुले बहस गरेका छन् । 

जिल्ला अदालत काठमाडौंका न्यायाधीश भोलानाथ ढकालको इजलासमा आज जिल्ला सरकारी वकिल कार्यालयका जिल्ला न्यायाधीक्ता जनक प्रसाद घिमिरे, वासुदेव शर्मा, सहायक जिल्ला न्यायाधीवक्ता प्रकाश घिमिरे र प्रकाश ज्ञवालीले बहस गरे । हिजो आइतबार ४ जना सरकारी वकिलले बहस गरेका थिए । 

आजै प्रतिवादीशिवजी भट्टराई, रुद्र कुमार श्रेष्ठ र बालकृष्ण श्रेष्ठको तर्फबाट बहस गरेका छन् । भट्टराईको तर्फबाट अधिवक्ता प्रकाश आचार्य, गणेशमान प्रधान, भिमबहादुर गुरुङ र वरिष्ठ अधिवक्ता मुकुन्द शर्मा पौडेलले बहस गरेका भने रुद्रकुमार श्रेष्ठको तर्फबाट वरिष्ठ अधिवक्ता यदुनाथ खनाल र अधिवक्ता रुपक बहादुर बोगटीले बहस गरेका छन् । 

बालकृष्ण श्रेष्ठको तर्फबाट वरिष्ठ अधिवक्ता बाबुराजा जोशीले बहस गरेका छन् । हाल प्रकरणमा पक्राउ परेका भाटभटेनी सुपर मार्केका संचालक मिनबहादुर गुरुङसहित १८ हिरासतमा छन् ।