अरुण तेश्रो जल विद्युत आयोजनमा भारतीय कम्पनीले ज्यादति गरेको भन्दै स्थानीय आन्दोलित

१९ भदौ, काठमाडौं । संखुवासभामा निर्माणाधीन ९ सय मेगावाटको अरुण तेस्रो जलविद्युत् आयोजनाको विद्युतगृह स्थानीयले ठप्प पारेका छन् । जग्गाको मुआब्जा नभएको भन्दै उनीहरुले गृह चल्न दिएका छैनन् ।

अरुण तेस्रो प्रवेशमार्गको छ्याङकुटी–दिदिड पुखुवा सडकखण्डको मुआब्जा वितरणमा आयोजनाको ठेक्का पाएको भारतीय कम्पनीले ढिलाई गरेको उनीहरुको भनाइ छ । आक्राेशित उनीहरू आन्दोलनमा उत्रिएका छन् ।

मुआब्जा तत्काल वितरण गर्न माग गर्दै रुण तेस्रोको विद्युत गृहस्थल र सडक अनिश्चितकालका लागि बन्द गरेको घोषणा गरेका छन् । कम्पनीले आफूहरुलाई झुक्यानमा पारेर सुकुम्वासी बनाएको भन्दै पालमुनिको सधैं पालमुनिको बास बस्न नसकिने बताएका छन् ।

अरुण तेस्रो प्रवेशमार्गका जग्गाधनीहरुले संघर्ष समिति गठन गरेर मंगलबार ब्यानरसहित सडक अवरूद्ध गर्दै प्रदर्शन गरेका छन् । अरुण तेस्रो प्रवेशमार्गको २४ किलोमिटर क्षेत्रको मुआब्जा नपाएको उनीहरुले बताएका छन् । 

जिल्ला प्रशासन कार्यालय संखुवासभामा गठित छुट मुआब्जा निर्धारण समितिले गत वैशाख २६ गते छयाङकुटी–दिदिड सडकखण्डको प्रति रोपनी ११ लाख ७५ हजार दिने निर्णय गरेपनि वितरण भएको छैन । अरुण तेस्रो विद्युत् आयोजना निर्माण भारतीय कम्पनी सतलजले गरिरहेको छ । मुआब्जा नपाएसम्म गविद्युत गृह संचालन गर्न नदिने संघर्ष समितिका संयोजक जनीकुमार राईले बताए ।