मुख्यमन्त्री थापाविरुद्धको रिट आज पनि ‘हेर्दाहेर्दै’मा, अर्काे सुनुवाइ बिहीबार मात्र

१९ भदौ, काठमाडौं । कोशी प्रदेशका मुख्यमन्त्री उद्धव थापाले पाएको विश्वासको मत विरुद्ध एमालेका नेता हिक्मतकुमार कार्कीले दायर गराएको रिट  निवेदनमाथि आज पनि सुनुवाइ सकिएन । सुनुवाइ नसकेपछि रिटलाई सर्वोच्च अदालत प्रशासनले ‘हेर्दाहेर्दै’मा राखेको छ ।

रिटको सुनुवाइ न्यायाधीश सपना प्रधान मल्ल, कुमार चुँडाल र नहकुल सुवेदीको पूर्ण इजलासमा सोमबारदेखि सुनुवाइ भइरहेको छ । आज दिनभर प्रतिवादी पक्षका सरकारी वकिल, कोशी प्रदेशको मुख्य न्यायाधिवक्ता कार्यालयका मुख्य न्यायाधिवक्ता लगायतले बहस गरे ।

प्रतिवादी थापा, प्रदेश प्रमुख परशुराम खापुङ लगायत तर्फका कानुन व्यवसायीहरूको बहस अझै बाँकी छ । प्रतिवादी पक्षका वकिलहरूको बहस सकिएपछि रिट निवेदक कार्कीका कानुन व्यवसायीले जवाफी बहस गर्नेछन् । भाेलि बुधबार कृष्ण जन्मष्टमीको दिन सार्वजनिक बिदा परेकोले बाँकी सुनुवाइ बिहीबार मात्र हुने भएको छ । 

साउन १६ मा दोस्रो पटक कोशीका मुख्यमन्त्री नियुक्त भएका मुख्यमन्त्री थापाले गत भदौ ४ गते मुख्यमन्त्री थापाले प्रदेश सभाबाट विश्वासको मत लिँदा प्रदेश सभाको बैठकमा अध्यक्षता गरेका कांग्रेस सांसद इस्राइल मन्सुरीको पनि मत लिएको विषयलाई असंवैधानिक भन्दै कार्कीले भदौ ६ मा सर्वोच्च अदालतमा रिट हालेका थिए । उनले थापा नेतृत्वको सरकार बदर गरी संविधानका धारा १६८ को (३) बमोजिम प्रदेशसभाको सबैभन्दा ठूलो दल एमालेको तर्फबाट आफ्नो नेतृत्वमा सरकार गठन गर्ने परमादेश जारी हुनुपर्ने माग गरेका छन् । 

९३ सदस्य रहेको कोशी प्रदेशमा सरकार गठनका लागि कम्तीमा ४७ सदस्यको समर्थन चाहिन्छ । थापाले मन्सुरी समेत गरेर ४७ मत पाएका थिए । सभाका अध्यक्षले कुनै पनि प्रस्तावमा मतदान हुँदा मत बराबर भएको अवस्थामा मात्र निर्णायक मत दिन पाउने व्यवस्था संविधानले गरेको जनाउँदै मन्सुरीको मत असंवैधानिक रहेको कार्कीले जिकिर छ । विश्वासको मत लिँदा थापाको पक्षमा ४७ र विपक्षमा ३० मत परेको थियो । सोको घोषणा मन्सुरीले नै गरेका थिए ।