गाडी रोकर सप्तकोशीमा बेपत्ता डाक्टरको शव ११ दिनपछि फेला

२० भदौ, काठमाडौं । सुनसरी र उदयपुर जोड्ने सप्तकोशी नदीको चतराघाटस्थित पुलमा कार छाडेर १० दिनअघि बेपत्ता एकजना डाक्टर प्रज्वल कोइरालाको शव फेला परेको छ । 

मदन भण्डारी ट्रमा सेन्टर उर्लाबारीमा कार्यरत जनरल सर्जन कोइराला भदौ १० गते दिउँसो उदयपुरको बेलका नगरपालिका–८ स्थित कोशी पुलको उदयपुरखण्डतर्फ आफ्नो प्रदेश १–०२–००२ च ४१६६ नम्बरको कार छाडेर बेपत्ता भएका थिए । झापाको दमक नगरपालिका–१ घर भएका ३८ वर्षीय कोइरालाको शव एक टापु क्षेत्रमा भेटिएको हो ।  

सप्तकोसीमा माछा मार्नेहरूले मंगलबार साँझ शव तैरिरहेको देखेपछि प्रहरीलाई खबर गरेका थिए । शव सडिसकेको अवस्थामा रहेको छ । कोइरालाले हामफालेको हो वा अन्य कारणले ज्यान गएको भन्नेबारे अनुसन्धान भइरहेको प्रहरीले जनाएको छ ।

शव पोष्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको छ । बेपत्ताको खबरपछि सुनसरीबाट सशस्त्र प्रहरीको गोताखोरको टोली समेत परिचालन गरी खोजी गर्दासमेत भेटिएको थिएन । घटनाका कारण पत्ता लाग्न बाँकी रहेपनि प्रेम सम्बन्धका कारण कोइरालाको ज्यान गएको चर्चा पनि चलेको छ ।