माधव नेपालको पार्टीमा धाँजा फाट्न सुरु, खनाल पक्षबाट विवाद सुरु

२१ भदौ, काठमाडौं । माधव नेपालले नेतृत्व गरेको नेकपा एस पार्टीभित्रकाे विवाद उत्कर्षमा पुगेको छ । एमालेबाट विभाजित भएको दुई वर्ष नपुग्दै नेकपा एसका नेताहरूबीच विवाद बढेको हो । सरकारमा रहेको पक्ष र सरकारमा नगएको पक्षबीच विवाद बढेको हो ।

विवाद बढाउनमा एसका वरिष्ठ नेता झलनाथ खनालको भूमिका रहेको छ । पछिल्लो पटक पार्टीका सबै बैठकमा महाधिवेशन र पार्टी अध्यक्षको राजनीतिक प्रतिवेदनमै गम्भीर मतभेद उत्पन्न भएको थियो ।

पार्टीको  महाधिवेशन कहिले गर्ने भन्ने बारेमा  समझदारी जुट्न नसक्दा राष्ट्रिय महाधिवेशन अन्योलमा परेको छ । साथै महाधिवेशन अघि प्रस्तुत हुनुपर्ने राजनीतिक प्रतिवेदनको विषयमा पनि सहमति जुट्न सकेको छैन । ‘ माधव नेपालको राजनीतिक प्रतिवेदनमा प्रधान शत्रु कसलाई मान्नेमा अन्योल छ, पार्टी निर्माणको कुरा गरिएको छ, तर कुन कुन समूहलाई लक्षित हो भने अहिलेसम्म लक्षित वर्ग तोकिएको छैन, सरकार र मोर्चा गठनबारे पार्टीमा विवाद छ, समाधान खोजिएको छैन, एमालेलाई हेर्ने दृष्टिकोण बाझिएको छ, संगठनको संरचना एमालेको जस्तै बनाइएको छ’, सचिवालय बैठक सकिएपछि एक पदाधिकारीले भने ।

गत सोमबार सम्पन्न सचिवालय बैठकमा अध्यक्ष माधवकुमार नेपालले आगामी माघ ५–७ गते गर्ने प्रस्ताव राखेका थिए । खनाल पक्षले यो विषयमा सहमत जनाएन ।  ३ महिने अभियानकै बेला महाधिवेशनको तयारी गर्न सम्भव नहुने सम्मानित नेता झलनाथ खनाल लगायतले विषय उठाएपछि बैठक कुनै ठोस निर्णय नगरी सकिएको छ । बैठकले  एमसीसी कार्यान्वयनको अनुगमन गर्ने भन्दै उपाध्यक्ष राजेन्द्र पाण्डेको संयोजकत्वमा कार्यदल बनाएको थियो ।

जब कि एमसीसीको पक्षमा पार्टी अध्यक्ष माधव नेपाल स्वयं उभिएका छन् । आइतबार मात्रै एससीसी कार्यान्वयनको पक्षमा सरकार उभिएको थियो । सम्झौता नै भइसकेको र दैनिक कार्याआरम्भ भई पाँच वर्षभित्र सक्ने सहमति गरिएको छ ।

झलनाथ खनालले भने एमसीसीको विरोध गर्दै आएका छन् । पार्टी र बाहिर दुवै फोरममा उनले विरोध गरेका छन् । यतिबेला एसका पदाधिकारीहरू पनि एमसीसीको पक्षमा छैनन्, त्यही कारण उनले व्याख्यात्मक टिप्पणी कार्यान्वयन भए नभएको र कार्यान्वयनको पक्षमा कस्तो रहेको छ भनेर अनुगमन गर्ने भनेर पाण्डेलाई जिम्मा लगाइएको हो । माधव नेपाल विदेश भ्रमणमा रहेका बेला ललितानिवास प्रकरणमा माधव नेपालले गल्ती गरेको भए हतकडी लगाउनु पर्छ भन्ने अभिव्यक्ति दिएका पाण्डेलाई एमसीसी अनुगमनको जिम्मा दिएका छन् ।

नयाँ पार्टी, पुरानै प्रवृत्तिमा चलेका कारणले पनि एसभित्र अझै विवाद रहेको पार्टीका नेताहरूले बताइरहेका बेला महाधिवेशनको मितिमै कचकच परेर सचिवालय बैठक अवरोध भएको थियो । एमालेबाट छुट्टिएको दुई वर्ष बित्दा नबित्दै नेकपा एकीकृत समाजवादीभित्र गुटबन्दी शुरु हुँदा अहिले रामकुमारी झाँक्रीसहितकाे एउटा टोली निरन्तर एमालेसँगको सम्पर्क सम्बन्धमा रहेको छ । ‘झाँक्रीसहितको टोली कुन बेला एमालेमा प्रवेश गर्ने हो’, एस निकट रहेका एक नेताले भने । सम्मानित नेता झलनाथ खनालले अध्यक्ष नेपालको कार्यशैली, नेतृत्व र विचारप्रति प्रश्न उठाउँदै पार्टी कमिटीमै लिखित दस्तावेज पेस मात्र गरेका छैनन्, उनले कार्यशैली र सैद्धान्तिक विषयमाथि समेत आफ्नो धारणा स्पष्ट रहेको बताएका छन् ।

एमालेकालमै पनि नेपाल र खनालबीच खासै निकटता थिएन । तत्कालीन नेकपामा केपी ओलीविरुद्धको मोर्चाबन्दीले प्रचण्ड, नेपाल र खनाललाई एकठाउँ ल्याइदिएपछि स्वार्थले एक ठाउँ जोडेको हो । तर नेकपा एसभित्र देखिएको विवादले दुवै नेताहरूलाई एकसाथ एकै ठाउँमा राख्छ कि राख्दैन भन्ने आंशका जन्माएको छ । खनालले अहिले पनि जनताकाे बहुदलीय जनवादलाई मान्ने राजनीतिक प्रतिवेदन पेश गरेका छैनन् । तर नेपालले पार्टीको तत्कालीन र दीर्घकालीन दुवै कार्यनीति रणनीति बहुदलीय जनवाद भएको बताउँदै आएका छन् ।