मुख्यमन्त्री थापाविरुद्धको रिटमा जवाफी बहस सकियो, फैसला आजै

२१ भदौ, काठमाडौं । कोशी प्रदेशका मुख्यमन्त्री उद्धव थापाविरुद्ध सर्वोच्च अदालतमा परेको रिट निवदेनमाथि रिट पक्षका वकिलहरुको जवाफी बहस सकेको छ । बिहीबार अधिवक्ताहरु टिकाराम भट्टराई, केशव बडाल र सुरेन्द्र भण्डारीले जवाफी बहस गरेका थिए । 

न्यायाधीशत्रय सपना प्रधान मल्ल, कुमार चुँडाल र नहकुल सुवेदीको पूर्ण इजलासमा आज तेस्रो दिन निरन्तर सुनुवाइ भएको हो । विपक्षीका वकिलहरुको बहस सकिएसँगै रिट पक्षका वकिलबाट जवाफी बहस भएको थियो ।

फैसला आजै आउने संभावना बढेको छ । मुख्यमन्त्री थापाले भदौ ४ मा प्रदेशसभाबाट लिएको विश्वासको मतअसंवैधानिक रहेको भन्दै पूर्व मुख्यमन्त्री तथा एमालेका कोशी प्रदेशसभा संसदीय दलका नेता हिक्मतकुमार कार्कीले प्रदेश प्रमुख, मुख्यमन्त्री थापा लगायतविरुद्ध भदौ ६ मा रिट निवेदन दायर गराएका थिए ।