काेशी प्रदेश मुख्यमन्त्रीमा हिक्मत कार्की नियुक्त हुँदै

२२ भदौ, काठमाडौं । कोशी प्रदेशमा नेकपा (एमाले) संसदीय दलका नेता हिक्मत कार्की आजै मुख्यमन्त्रीमा नियुक्त हुने भएका छन् । बिहीबार भएको सर्वोच्च अदालतको परमादेशबमोजिम उलाई प्रदेश प्रमुख परशुरामखापुङले नियुक्त गर्दैछन् । सोसम्बन्धी सर्वोच्चको पत्र प्रदेश प्रमुखको कार्यालयमा पुगिसकेको छ ।

बिहीबार न्यायाधीशहरु सपना प्रधान मल्ल, कुमार चुडाल र नहकुल सुवेदीको पूर्ण इजलासले मुख्यमन्त्री रहेका कांग्रेसका उद्वव थापा पदमुक्त गर्दै कार्कीलाई फैसला भएकाे ४८ घण्टाभित्र मुख्यमन्त्री नियुक्त गर्न परमादेश जारी गरेको थियो । साेहीबमाेजित प्रमुखको कार्यालयले कार्कीलाई आजै नियुक्त र शपथ खुवाउने तयारी थालेको छ । 

कार्कीलाई संविधानको धारा १६८ को (३) बमोजिम प्रदेशसभाको सबैभन्दा ठूलो दलको नेताको हैषियतमा मुख्यमन्त्री नियुक्त गरिँदैछ । उनले नियुक्ति पाएको मितिदेखि ३० दिनभित्र प्रदेशसभाबाट विश्वासको मत लिनइसक्नुपर्ने संवैधानिक व्यवस्था छ । यसअघि सोही व्यवस्थाअनुसार विश्वासको मत पाउन नसक्दा कार्की पदच्यूत भई थापा मुख्यमन्त्री भएका थिए । 

तर थापाले भदौ ४ मा प्रदेशसभाबाट विश्वासको मत लिने क्रममा सभामुखको भूमिका निर्वाह गरिरहेका सभाध्यक्ष कांग्रेसका इस्राइल मन्सुरीको मत समेत गणना गरेपछि उनको पद धरापमा परेको हो । उक्त विश्वासको मत असंवैधानिक रहेको भन्दै प्रमुख खापुङ, मुख्यमन्त्री थापा लगायतलाई विपक्षी बनाइ कार्कीले भदौ ६ मा सर्वोच्चमा हालेको मुद्दामा सर्वोच्चले हिजो कार्कीको पक्षमा फैसला गरेको हो । कार्कीले थापा नेतृत्वको सरकार भंग गरी आफू नेतृत्वमा सरकार गठन गर्ने परमादेश माग गरेका थिए । 

अब नियुक्त हुने कार्कीले पनि ३० दिनभित्र विश्वासको पाउन नसकेको खण्डमा सोही धाराको उपधारा ५ बमोजिम प्रदेशसभा कुनैपनि सदस्यले आफूले विश्वासको मत लिन सक्ने आधार देखाएर मुख्यमन्त्रीमा दाबी पेस गर्ने बाटो खुला हुन जानेछ ।

त्यसरी परेका दाबीबमोजिम मुख्यमन्त्री नियुक्त हुने र उनले पनि ३० दिनभित्र विश्वासको मत लिन नसकेको खण्डमा प्रदेशसँग मध्यवधि निर्वाचनमा जानुको विकल्प रहँदैन ।