शुक्रबार शेखर कोइरालाको पत्रकारहरुसँंग बसिबियाँलो !

२३ भदौ, काठमाडौं । नेपाली कांग्रेसका वरिष्ठ नेता डा. शेखर कोइरालाले शुक्रबार पत्रकारहरुसँग मुलुककाबारेका गुनासो सुनाए । अहिलेको अराजकता र जनतामा देखिएको निराशा हटाउन कांग्रेस नेतृत्वमा सरकारबन्नुपर्ने आवश्यकत्ता औंल्याए । प्रधानमन्त्री पुष्पकमल दाहाल संयुक्त राष्ट्रसंघको महासभामा भाग लिन अमेरिका जाने तयारीमा रहेको समयमा कोइरालाले पत्रकारहरुलाई बोलाएर मुलुकको नेतृत्व कांग्रेसले नगरी नहुने अवस्था देखिएको बताए । 

सरकारको नेतृत्व नेपाली कांग्रेसले नै गर्नुपर्ने केही कारणहरु पनि उनले प्रस्तुत गरेका थिए । आफूले सभापति शेरबहादुर देउवासँग पनियो विषय राखेको बताए । कांग्रेसको नेतृत्वमा सरकार बने अहिले देखिएको अराजकता हटेर जाने भन्दै उनले कांग्रेसले ९ मन्त्रालय लिएर सरकारमा गएपनि जनता र कार्यकर्तालाई सरकारमा भएको अनुभूति नभएको बताए । अहिलेकै गठबन्धन निरन्तर रहने गरी कांग्रेसले सरकारको नेतृत्व लिन सक्छ, उनले भने । 

प्रधानमन्त्री को भन्ने विषय छ, संसदीय दल नेता सभापति देउवा नै भएकोले उहाँ नै प्रधानमन्त्री बन्ने हो । संसदीय दल नेता परिवर्तनका कुरा पनि आएका छन् तर त्यो परिस्थिति आइसकेको छैन । सरकार परिवर्तन हुनुपर्छ र कांग्रेसकै नेतृत्वमा भनेर मैले भनिराखेको छु । तर अहिले नै सरकार परिवर्तन हुने परिस्थिति बनिरहेको छैन् । जनता बढी निरास भएका छन् । जनताले भोली नराम्रो परिस्थिति ल्याउन सक्छन् । यसका लागि कांग्रेस सचेत हुनुपर्छ, कोईरालाले भने । 

उनले केहि दिन अघि प्रधानमन्त्रीलाई भेटेको कुरा सुनाए । ‘मैले केही दिनअघि प्रधानमन्त्रीजीसँग भेटेको थिएँ । विभिन्न विषयबारे कुराकानी भए । ललिता निवास जग्गा प्रकरणजस्ता विषय पनि उठ्यो । यसमा प्रधानमन्त्रीजीले भन्नुभयो, माधव नेपाल र बाबुराम भट्टराईको बयान त लिएँ नि । मैले प्रश्न गरे, बयान लिनुभयो ? मलाई त थाहा छैन । सिआइबीका मानिस उहाँहरूका निवासमा गए होलान्, कुराकानी गरे होलान्, त्यसलाई बयान भन्न मिल्छ र? बयान लिन त उहाँहरूलाई सिआइबीमा झिकाउनुपर्याे, सरकारी वकिलको उपस्थितिमा बयान हुनुपयो ।’

उनले अदालतले सबै बिगारिदिएको भनेर प्रधानमन्त्रीजी भनेको बताए । मैले भने, सरकारले गलत गयो भने अदालत एक्टिभ भइहाल्छ नि, तपाइहरू गलत नगर्नुस्, संविधानअनुसार चल्नुस् । अनि अदालतले हस्तक्षेप पनि गर्दैन । देशमा दण्डहीनता बढेको छ, कुनै पनि कुरा ठिक ठाउँमा छैन भनेर प्रधानमन्त्रीजीलाई भनेको थिए, उनले भने । 

कोइरालाले आफू सभापति भएपनि नभएपनि सुशासनका पक्षमा वकालत गरिहने बताए । एक्लै भए पनि यो अभियानमा लागिरहने र जिल्ला–जिल्ला गएर पार्टीका साथीहरू र जनताहरूसँग कुराकानी गर्ने बताए । अहिले संघीयता चल्दैन भन्ने मानसिकता देखिएको भन्दै कांग्रेसकै कतिपय नेताहरुले संघीयता काम छैन भनिरहेको उनले बताए । केन्द्रमा बस्नेले अधिकार नदिने अनि संघीयता काम छैन भन्ने जस्ताकुरा वेठिक भएको भन्दै उनले आफू संघीयता अझै बलियो हुनुपर्छ भन्नेमा रहेको बताए । 

उनले सञ्चार माध्यमहरूमा पार्टीको गुटलाई धेरै महत्व दिएको हो कि जस्तो आफूलाई लागेको बताए । पार्टीको आन्तरिक जीवनमा असमझदारी हुने भएपनि विभाग गठन, भ्रातृ संस्थालगायतमा पनि कांग्रेस  पार्टीभित्र केही असमझदारीजस्ता देखिएको उनले बताए । विधि र विधानअनुसार चलिएन भने यस्तो अवस्था देखिन्छ, भ्रातृ संस्थाका सभापतिले जिल्ला सभापतिसँग समन्वय गरी ३ जनाको नाम मागेर तीमध्येबाट जिल्ला नेतृत्व चयन गर्ने समझदारी बनेकोमा त्यो उल्लंन भएपछि आफूले ध्यानाकर्षण गराएको उनको भनाइ छ । 

आफूले कुनै विभाग नमागेको र विभाग प्रमुख कसलाई बनाउने भन्ने सभापतिको अधिकार भएको भन्दै विधानले नै सभापतिलाई यो अधिकार दिएको बताए । उनले भने, ‘शेखर र गगनबीच असमझदारी भएका विषय आइरहेको देख्छु । हामीबीच त त्यस्तो केही छैन । सुशासनजस्ता एजेन्डामा हामी एकै ठाउँमा उभिएका छौं । कहिलेकाहीँ कुनै विषयमा म र गगनबीच पनि फरक मत हुन सक्छ । तर एजेन्डामा म र गगन एकै ठाउँमा छौं ।’

कोइरालाले आफू सभापतिको उम्मेदवार भएको बताए । पार्टी विधानअनुसार चार वर्षमा महाधिवेशन हुनुपर्छ । ०७८ मंसिरमा महाधिवेशन भएकोले अब १५ औं महाधिवेशन ०८२ भित्रै हुनुपर्छ । क्रियाशील सदस्यता छानबिन समितिमा महामन्त्री गगनजी नै हुनुहुन्छ, यसकारण समयमै महाधिवेशन हुन्छ भन्ने हाम्रो विश्वास छ । महाधिवेशन आउन अझै धेरै समय छ । समय छँदै मानिसहरू सभापतिका लागि दौडिएका छन् । यो देखेर मलाई अचम्म लागेको छ, उनले भने ।  

समाजवादी मोर्चा गठनप्रति पनि उनले टिप्पणी गरे । ‘नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र नेकपाल कम्युनिष्ट पार्टी मिलेर समाजवादी केन्द्र बनाएका छन् । यो केन्द्र बनाउनुको उद्देश्य कांग्रेसलाई ठेगान लगाउनु हो भन्ने प्रष्ट छ । यसबारे साउनमा बसेको केन्द्रीय समिति बैठकमा मैले कुरा राखेको थिएँ । तर ’हामीलाई नै जानकारी दिएर प्रचण्डजीले समाजवादी केन्द्र बनाएको हो भन्नेजस्ता जवाफ पाएँ ।’ यो केन्द्र कांग्रेसलाई ठेगान लगाउन बनाएको हो भन्ने म पुष्टि गरिदिन सक्छु । 

कांग्रेसबाट अहिलेको सरकारमा ९ जना मन्त्री रहेको र आफूले मन्त्रीहरूसँग कुराकानी गरिरहेको बताएँदै उनले मन्त्रीहरूले छानेको सचिव राख्न पाइएन भन्ने गुनासो बताए । कांग्रेसका मन्त्री भएका ठाउँमा प्रधानमन्त्रीीले नेकपा एमालेनिकट सचिवहरू पठाइदिएको दावी गरे । उनले भने, ‘मन्त्रीहरूले काम गर्न सक्ने स्थिति नै छैन । मन्त्री निरीह छन् । पेट्रोल हाल्ने पैसा पनि छैन रे मन्त्रालयमा । जनतालाई आशा जगाउँदै काम गर्नुपर्ने मन्त्रीहरू यस्तो समस्यामा छन् । मन्त्रीहरूले आफूनिकटलाई मन्त्रालयमा राख्न सकेका छैनन्, विभिन्न नियुक्तिमा पहिले नै कोही माओवादी त कोही एमालेका मानिसले नियुक्ति लिएका छन् ।’

उनले आफूले प्रचण्ड नेतृत्वको सरकार परिवर्तन हुनुपर्छ र कांग्रेसकै नेतृत्वमा अबको सरकार बनाउनुपर्छ भनेर निरन्तर भनेको स्मरण गराए । तर, अहिले नै सरकार परिवर्तन हुने आफूले नदेखेको उनको भनाई थियो । उनले भने,‘अहिले जे–जसरी अघि बढेका छौं, त्यसले त प्रचण्डजीलाई धेरै नै सहज बनाइदिएको छ। उस्तै परे उहाँ नै ५ वर्ष प्रधानमन्त्री हुन बेर छैन ।’
 
मुलुक अराजकतातिर जाँदैछ भन्ने आफूलाई धेरै चिन्ता लागेको उनले सुनाए । देशमा अहिले राजनीतिक, आर्थिक, सामाजिक, साँस्कृतिक, धार्मिक केही कुरा पनि ठिकसँग चलेको छैन । मुलुक अराजकतातिर जाँदैछ । हुँदाहुँदा कुटनीति पनि अराजक हुन थाल्यो । चुच्चे नक्साको विषय अहिले फेरि चर्चामा आएको छ । पहिलेका र अहिलेका परराष्ट्र मन्त्रीले यसबारे फरक–फरक कुरा राखेका छन्, चुच्चे नक्साको नोट अरू देशहरूलाई पठाइयो कि पठाइएन भन्ने बारेमा, उनले सुनाए । 
 
कोशीमा नामाकरणदेखि नै विवाद सिर्जना भएको भन्दै कोइरालाले केही सांसदहरूले जानीय हिसाबबाट नाम राख्नुपर्छ भनेका थिए तर अधिकांशले कोशी राख्ने भनेर कोशी नाम राखिएको बताए । कोशी पनि सम्यताको एक परिचय हो भन्ने दर्शाइएको थियो, उनले भने, ‘यो विषय केही सेलाएको थियो अरू विषय आयो– गोरू काटेर खाएको, मन्दिरनजिकै चर्च बन्न दिइयो भन्नेजस्ता । फेसबुक र टिकटकमा भिडिओ क्लिप आयो गोरू काटेर खाएका विषय । यसमा कतिले गाली गरेका थिए, के–के भनेका थिए । संयोगले म त्यसबेला विराटनगरमै थिएँ । म धरान पनि गएँ । साथीभाइहरूसँग कुराकानी गरे । धरानमा देख्दा धार्मिक लडाइँ जस्तो देखिए पनि त्यो जातीय लडाइँ हो कि जस्तो धरान पुगेपछि मलाई लाग्यो ।’

यसमा झिल्को दिने काम प्रधानमन्त्री प्रचण्डजीको अभिव्यक्ति भएको उनले बताए । आदिवासी जनजाती दिवसमा प्रधानमन्त्री प्रचण्डले बहुमत देऊ, जातीय राज्य दिन्छु’ भन्ने अभिव्यक्ति दिएको भन्दै कोइरालाले एउटा पार्टीको अध्यक्षले यस्तो बोलेको भए ठिकै थियो । तर, तर प्रचण्ड अहिले मुलुकको प्रधानमन्त्री भएकाले प्रतिक्रिया दिनुपरेको बताए ।