कोशी प्रदेशको नामाकरणलाई लिएर जातीय दंगा भड्काउन खोजिएको छ : प्रधानमन्त्री

२५ भदौ, काठमाडौं । सोमबार मोरङको विराटनगर पुगेका प्रधानमन्त्री पुष्पकमल दाहाल ‘प्रचण्ड’ले कोशी प्रदेशको नामाकरणलाई लिएर जातीय दंगा भड्काउने किसिमका गतिविधि भइरहेको बताएका छन् । 

नेकपा (माओवादी केन्द्र)का अध्यक्षसमेत रहेका प्रम प्रचण्डले सोमबार विराटनगरमा समाजवादी मोर्चाले आयोजना गरेको प्रदेश स्तरीय सन्देशसभालाई सम्बोधन गर्दै सरकारले थाले भ्रष्टाचार र अन्यायविरुद्धको अभियानलाई असफल तुल्याउने केही समूहले कोशी नाममा खेलिरहेको बताए । कोशी प्रदेशको नामकरण विषयमा उत्पन्न समस्या समाधान गर्न आफूले प्रयास गरिरहेको बताए ।

उनले प्रतिक्रियावादी, धार्मिक अतिवादी र गणतन्त्रविरोधहरुले प्रदेश नामाकरणलाई मुठभेडमा लैजान खोजेको बताए । प्रदेशको नाम विवाद समाधान दलहरु मिलेर मात्र हुने उनको भनाइ थियो । सरकारले काठमाडौंबाट भ्रष्टाचारविरुद्ध एक्सन जारी राखेको बेला पूर्वमा केही समूहले विभिन्न बहानामा चालबाजी गरिरहेको उनले बताए । 

उनले सरकार टिकिँदैन कि भन्ने डरले भ्रष्टाचारका फाइल खोल्न रोकिन्छ भन्ने आशंका नपाल्न समेत उनले आग्रह गरे । नक्कली शरणार्थी, बालुवाटारको ललिता निवास र सुन तस्करी काण्डका फाइल खोलेर भ्रष्टचारविरुद्ध ठूलाे अभियान चलाएदेखि नै सरकारविरुद्ध विभिन्न खेल र षडयन्त्र सुरु भएको बताए । उनले आफू अहिले हतियारबिनाको युद्धमा रहेको र यसमा जनताको साथ चाहिएको बताए । उनले सरकारमा रहेसम्म भ्रष्टाचारविरुद्ध अभियान कडाइसाथ अगाडि बढाउने बताए ।

सम्बाेधनका क्रममा उनले आसन्न चीन भ्रमणमा कृषि क्षेत्रको विकास र व्यापार घाटा कम गर्ने, नाकाहरू  खोल्ने, चीनसँग विद्युत् व्यापारको ढोका खोल्ने विषयमा समझदारी हुने बताए ।

उनले एमाले अध्यक्षले सार्वजनिक रुपमा दिँदै आइरहेका कोशी प्रदेश नामाकरणबारे कडा अभिव्यक्तिप्रति लक्षित गर्दै सरकारले ‘इट्टाको जवाफ पत्थर’ले दिने बताउँदै हरेकले त्यही तरिका अपनाउन सहभागीहरुसँग अपिल गरे ।

कोशी प्रदेश नामाकरण खारेजीको माग गर्दै पहिचान पक्षधर संघसंस्थाहरुले चलाइरहेको आन्दोलनमा सरकारमा रहेका दलका कार्यकर्ता मिसिएर एमालेका नेताहरुलाई छानीछानी ढुंगा हानेको भन्दै ओलीले माओवादी केन्द्र र एकीकृत समाजवादीमाथि दोष लगाउँदै आइरहेका छन् । ओलील ढुंगा हान्नेलाई ‘आतंककारी’को संज्ञा समेत दिएका छन् ।