नेम्वाङको निधनप्रति बाबुरामले भने- ‘एउटा असल मान्छे छिट्टै जानुभयो’

२६ भदौर, काठमाडौं । नेपाल समाजवादी पार्टी नेपालका अध्यक्ष डा. बाबुराम भट्टराईले एमाले नेता एवं सांसद सुवासचन्द्र नेम्वाङलाई असल मान्छेको रुपमा स्मरण गरेका छन् । 

मंगलबार सामाजिक संजालमा सन्देश लेख्दै पूर्वप्रधानमन्त्री समेत रहेका डा. भट्टराईले संविधान निर्माणका बेलामा काम गर्दाका नेम्वाङसँगका मुख्य ३ दिन सधैं सम्झनामा रहिरहने बताएका छन् । उनले नेम्वाङ एउटा असल मान्छे भएको तर छिटै बिदा भएको उल्लेख गरेका छन् । 

‘संविधान निर्माण गर्दाका ती दिन सधैं सम्झनामा रहिरहनेछन्, एउटा असल मान्छे छिटै जानुभयो। अलविदा सुवासजी !’ भट्टराईले फेसबुकमा नेम्वाङसँगकाे तस्बिर पाेष्ट गर्दै  स्टाटस लेखेका छन् । २०६४ को पहिलो संविधानसभाको कार्यकालको अन्तिमतिर प्रधानमन्त्री बनेको भट्टराईले २०७० मंसिरमा दोस्रो संविधानसभा आयोजनापूर्व पूर्वप्रन्या खिलराज रेग्मीलाई मन्त्रिपरिषद अध्यक्ष बनाएर प्रधानमन्त्री पद त्याग गरेका थिए । रेग्मीले नै दोस्रो संविधानसभाको निर्वाचन गराएका थिए । दोस्रो पटक गठित संविधानसभाले २०७२ असोज ३ मा वर्तमान संविधान जारी गरेको थियो ।

पहिलो र दोस्रो संविधानसभामा नेम्वाङ सभामुख थिए । संविधान घोषणा गर्दा कांग्रेसका तत्कालीन सभापति सुशिल कोइराला नेतृत्वको सरकार थियो ।

पूर्वसभामुख एवं प्रतिनिधिसभा सदस्य समेत रहेका एमालेका उपाध्यक्ष नेम्वाङको हृदयघातबाट गएराति निधन भएको थियो । बालुवाटारस्थित घरको ट्वाइलेटमा ढलेका अवस्था उद्धार गरी त्रिवि शिक्षण अस्पताल महाराजगन्जमा पुर्याउँदा चिकित्सकले ३ बजे मृत घोषणा गरेका थिए । नेम्वाङको निधन अस्पताल ल्याइपुर्याउन पहिल्यै भइसकेको अवस्था पाइएको अस्पतालले आज एक प्रेस विज्ञप्ति निकालेर स्पष्ट पारेको छ ।

यो पनि पढ्नुहोस