धनकुटामा बाँदर नियन्त्रण गर्न वनमा रोपियो फलफूलका विरुवा

२६ भदौ, धनकुटा । बाँदर नियन्त्रणका लागि धनकुटाका सामुदायिक वनमा फलफूलका बिरुवा रोप्न सुरु गरिएको छ । किसानका खेतीबाली नष्ट गर्ने क्रममा नरोकिएपछि स्थानीयले बाँदरलाई वनमै रोक्ने उपायस्वरुप वनमा फलफूलका बिरुवा रोप्न सुरु गरिएको हो । 

बिरुवाका लागि कोशी प्रदेश सरकारको १० लाखको सहयोग गरेको छ । डिभिजन जिल्ला वन कार्यालयले ‘प्रदेश वन विकास कार्यक्रम’अन्तर्गत स्थानीयको सहयोग लिएर हालसम्म धनकुटामा आठ हेक्टर अर्थात करिब १५७ रोपनी क्षेत्रमा ७ सात वटा सामुदायिक वनमा विभिन्न नौ जातका १२ हजार सात सय वनजन्य फलफूलका बिरुवा रोपिएको वन कार्यालयले जनाएको छ । 

पाख्रिबास नगरपालिकाको जनता सामुदायिक वन, महालक्ष्मी नगरपालिकाको अर्खौले, छथर जोरपाटी गाउँपालिकाको गोगनपानी, धनकुटा नगरपालिकाको ढोडनी कालीवन र लामाटार, चौबिसे गाउँपालिकाको बुटेनी र सागुरीगढी गाउँपालिकाको जोगीथुम्का सामुदायिक वनमा बिरुवा रोपिएको छ ।

प्रत्येक सामुदायिक वनमा कहटहर, अम्बा, अमला, जामुन, लप्सी, बर्रो, ओखर, हलुवाबेद र चिउरीका एक हजार १२ देखि एक हजार १९ वटासम्म बिरुवा रोपिएको कार्यालयको दाबी छ । जिल्लामा हाल तीन सय ८७ सामुदायिक वन छन् । आगामी वर्षमा पनि कार्यक्रमलाई निरन्तरता दिने जनाइएको छ ।

पहाडी क्षेत्रका सबै जिल्लामा रातो बाँदरको संख्या व्यापक मात्रामा बढेको र यसले किसानका खेतीबाली खाएर बस्ती नै विस्थापनको अस्थामा पुर्याएको भन्दै सांसदहरुले बाँदर आतंक नियन्त्रणका लागि सरकारसँग माग गर्दै आइरहेका छन् । संसदकाे कृषि, सहकारी तथा प्राकृतिक स्रोत समितिकी सभापति आरजु राणाले बाँदर आतंकका नियन्त्रणमा गर्न परिवार नियोजन प्रणाली लागू गर्नुपर्ने बताउँदै आएकी छन् । कानून नहुँदा यो प्रणाली लगाू गर्न सकिरहेका छैनन् ।