रत्नपार्क-सूर्यविनायकसम्म द्रूत बस सेवा संचालन, उद्घाटनका दिन मन्त्री र मेयर सवार

३ असोज, काठमाडौं । सरकारले काठमाडौं उपत्यकामा पहिलोपटक द्रूत बस सेवा सुरु गरेको छ । संविधान दिवसको अवसर पारेर काठमाडौंको रत्नपार्कस्थित शान्तिबाटिकाबाट भक्तपुरको सूर्यविनायकसम्म करिब १३ किलोमिटरमा द्रूत बस सेवा सुरु गरेको हो ।

सेवाको उद्घाटन बुधबार बिहान भौतिक पूर्वाधार तथा यातायात मन्त्री प्रकाश ज्वालाले गरे । आज २ वटा बसले सेवा दिनेछ । भोलि बिहीबारबाट सर्वसाधारणका लागि २५ वटा बस संचालन हुने सडक विभागले जनाएको छ । 

बिहान कार्यालय जाने ९–११ र बेलुका कार्यालय छुट्ने समय ४–६ बजेसम्म बस सेवा संचालन हुनेछ । बसले एकतर्फी ४५ मिनेटमा पुर्याउने जनाइएको छ । उद्घाटनको दिन बसमा द्रूत सेवाका बसमा भौतिक पूर्वाधार तथा यातायात मन्त्री प्रकाश ज्वाला, बागमती प्रदेशका यातायातमन्त्री लक्ष्मण लम्साल, काठमाडौं महानगरपालिका मेयर बालेन शाह तथा मध्यपुर थिमि र सूर्यविनायक नगरपालिकाका मेयरहरु चढेर यात्रा गरेका छन् ।

द्रूत गतिका बस संचालनका लागि रत्नपार्कदेखि सूर्यविनायकसम्म सडकमा रातो रंग पोतेर अलग्गै लेन राता छुट्याइएको छ । बस संचालनका बेला उक्त लेनमा अन्य सवारी रोक्न निषेध गरिनेछ । चोकमा रातो बत्तीमा पनि बस रोकिने छैन । चलाउने क्रममा अवरोध आएमा दायाँबायाँ मोडेर पनि बस चलाउन पाइने भएको छ । रत्नपार्क र सूर्यविनायक दुवैतर्फबाट ५/५ मिनेटको फरकमा छुट्नेछन् ।