कहिले सकिन्छ बुटवल नारायणगढ सडकको काम ?

•मनिष अर्याल / नेपाल फोटो लाइब्रेरी 

१६ वैशाख, काठमाडौं । वि सं २०७५ चैत ८ गते तत्कालीन प्रधानमन्त्री केपी शर्मा ओलीले शिलान्यास गरेको ११३ किलोमिटर बुटवल नारायणगढ सडक खण्ड आजको दिन सम्म आइपुग्दा झण्डै ६ वर्ष पुग्न लागिसक्यो । 

बुटवल–नारायणगढको सडक शहरी भेगमा सिक्स लेन र जङ्गली क्षेत्रमा फोर लेन मा विस्तार कार्य दुई खण्डमा विभाजन गरेर काम अघि बढाइएको थियो । एसियन राजमार्गको गुणस्तर मापदण्डमा विस्तार गर्ने भनेर २०७५ सालमा सम्झौता भएको सडकको भौतिक प्रगति अहिलेसम्म ५० प्रतिशत पनि पुग्न सकेको छैन । 

पानी पर्यो त हिलो, घाम लाग्यो त धुलो अहिले सर्वसाधारणले भोग्नु परेको समस्या नै यही छ । काम सुरु गरिएपछिको ६ महिनासम्म पूर्व तयारी नभएको भन्दै , त्यस लगतै कोभिड महामारीले सडकको कामलाई असर गर्यो ।

अहिले पूर्व र पश्चिम खण्डका केही ठाउँमा कालोपत्रे सुरु भएको छ । १६ अर्ब ९९ करोड ५२ लाख रुपैयाँ लागत लाग्ने यो योजनामा एसियाली विकास बैंकले ८५ प्रतिशत र बाँकी नेपाल सरकारको लगानी रहने छ।