दाइजोको निहुँमा श्रीमती ‘हत्या’ गर्ने श्रीमान् पक्राउ

४ असोज, काठमाडौं । सुनसरी प्रहरीले दाइजोको निहुँमा श्रीमतीको ‘हत्या’ गर्ने एक जनालाई पक्राउ गरेको छ । पक्राउ पर्नेमा इनरूवा नगरपालिका–३ का ३२ वर्षीय नगेन्द्र भगत रहेका छन् । उनले माइतबाट दाइजो नल्याएको भन्दै शनिबार राति श्रीमती निकिता चौधरीको हत्या गरेको आरोप छ । 

हत्याको आरोपमा निकिताको माइतीले भगतविरुद्ध कर्तव्य ज्यान कसुरमा अनुसन्धान गर्न प्रहरीमा उजुरी दिएका थिए । सो उजुरीका आधारमा पक्राउ गरिएको हो । भगतले २१ महिना अगाडि निकितासँग मागी विवाह गरेका थिए । त्यसबेला ३५ लाख नगद, आठ तोला सुन, ९० तोला चाँदी र एक मोटरसाइकल दाइजोमा ल्याएका थिए ।

त्यो पनि अपुग भएको भन्दै श्रीमतीलाई कुटपिट गर्दै आइरहेका बेला ज्यान गएको माइती पक्षको दाबी छ । भगतका परिवारले भने घरि निकिता ट्वाइलेटमा लडेर घाइते भएकाे अवस्थामा उद्धार गरी उपचारका क्रममा  मृत्यु भएको र त, घरि झुण्डिएर आत्महत्या गरेको बताइरहेका छन् । निकिताको ११ महिनाको छोरा छन् ।