नेपालले दुई महिनामा भारतलाई बेच्यो ५ अर्ब ४३ करोड रुपैयाँको बिजुली

४ असोज, काठमाडौं । चालु आर्थिक वर्ष २०८०/८१ को सुरुको दुई महिनामा नेपालले भारतलाई ५ अर्ब  ४३ करोड ३१ लाख रुपैयाँको विद्युत भारततर्फ बिक्री गरेको छ । 

साउनमा १ अर्ब ९४ करोड ८४ लाख र भदौमा ३ अर्ब ४८ करोड ४८ लाख रुपैयाँको विद्युत् भारतीय बजारमा निर्यात गरेको नेपाल विद्युत् प्राधिकरणले जनाएको छ । 

भारतलाई बिक्री गरिएको बिजुलीको मूल्य प्रतियुनिट औसत बिक्री दर साउनमा ८ रुपैयाँ १३ पैसा र भदौमा १२ रुपैयाँ २७ पैसा रहेको जनाइएको छ । दुई महिनाको समग्र औसत बिक्री दर प्रतियुनिट १० रुपैयाँ ३७ पैसा रहेको छ । माग र आपूर्तिका आधारमा हरेक महिना निर्यात बिजुलीको मुूल्य फरक हुन सक्ने प्राधिकरणले जनाएको छ ।

प्रधानमन्त्री प्रचण्डको गएको असार तेस्रो साता भएको भारत भ्रमणका क्रममा भारतले नेपालबाट १० वर्षमा १० हजार मेगावाट विजुली खरिद गर्ने सम्झौता भएको थियो । उक्त सम्झौतालाई भारत सरकारको मन्त्रिपरिषद्ले हालै मात्र अनुमोदन गरेको थियो ।