कोशी प्रदेशका मुख्यमन्त्री कार्की विश्वासको मत लिनुअघि बजेट पास गर्ने तयारीमा

७ असोज, काठमाडौं । कोशी प्रदेश सरकारका मुख्यमन्त्री हिक्मतकुमार कार्की विश्वासको मत लिनुअघि अध्यादेशको बजेट पास गर्ने  तयारी गरेका छन् । सर्वोच्च अदालतको परमादेशमा भदौ २१ मा कार्की मुख्यमन्त्री नियुक्त भएका थिए । उनले नियुक्ति पाएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ । 

त्यसपछि उनले अध्यादेशमार्फत भदौ २४ मा चालु आवको बजेट ल्याएका थिए । प्रदेशलाई बजेट होलिडेको अवस्थामा पुग्न नदिन बजेटमा दलहरुबीच सहमति जुटाउने प्रयास भइरहेको एमाले प्रमुख सचेतक रेवतीरमण भण्डारीले बताए । 

कोशीमा राजनीतिक दलहरुबीच ‘इगो’का कारण ८ महिनामा ४ वटा सरकार गठन भइसकेका छन् । पछिल्लो पटक मुख्यमन्त्री बनेका कार्कीले पनि विश्वासको मत पाउने संभावना न्यून बन्दै गएको छ । उनीसँग एमालेका ४० र राप्रपाका ६ गरी खुद ४६ सांसद मात्र छन् । सामान्य बहुमत पुर्याएर सरकार गठन गर्न वा गठित सरकार टिकाउन ४७ सांसदको समर्थन आवश्यक पर्छ । प्रतिपक्षी दलहरुसँग कुल ४७ साांसद खुलेका छन् ।

९३ सदस्यीय प्रदेशसभामा कुनैपनि प्रस्तावमा मत बराबर भएमा मात्र बैठकमा अध्यक्षता गरिरहेका अध्यक्षले निर्णायक मत दिन पाइने संवैधानिक व्यवस्था रहेको छ । तर बराबर मत बन्ने अवस्था कतैबाट देखिएको छैन । 
बराबर मतको अवस्थामा मात्र सभामुख वा बैठकका अध्यक्षले निर्णायक मत दिने व्यवस्थालाई कुल्चिँदा कोशीमा सरकार अस्थिर बनेको हो ।