६० किलो सुन तस्करी प्रकरणमा १३ प्रतिवादीको बयान सकियो

७ असोज, काठमाडौं । गत साउन २ मा हङकङबाट तस्करी गरेर काठमाडौँ ल्याइएको ६० किलो सुन प्रकरणमा २९ जनाविरुद्ध काठमाडौं जिल्ला अदालतमा चलाइएको  मुद्दामा १३ प्रतिवादीको बयान सकिएको छ । जिल्ला अदालतका न्यायाधीश माधवप्रसाद मैनालीको इजलासमा आजसम्ममा १३ जना प्रतिवादीको बयान सकिएको हो ।

७ चिनियाँ नागरिकहरू याओ पुचेङ्ग, लि वेन सुङ्ग, ली नेङकाई, डीङ सेग्फा, जीक्वाङ लिन, टीयान मि र वेन तोङको बयान पुरा भएको अदालत प्रशासनले जनाएको छ । तिब्बती मूलका भारतीय नागरिक ५३ वर्षीय थाप्तेन छिरिङसँग र बेल्जियन नागरिक दावा छिरिङको पनि बयान पुरा भएको जनाइएको छ ।

अन्य प्रतिवादी हर्कराज राई र भन्सार एजेन्ट रुकमिना सुब्बा, कृष्ण श्रेष्ठ र ट्रान्स ग्लोबल सर्भिसका सञ्चालक पुष्करराज भट्टको समेत बयान सकिएको छ । संगिठत अपराधमा ६० दिन अनुसन्धान सकेर प्रकरणमा प्रतिवादी बनाइ मुद्दा चलाइएकामध्ये ९ विदेशीसहित १८ जना फरार छन् ।

उक्त ६० केजी र त्यसअघि विमानस्थलबाटै भएको ९ केजी सुन तस्करी प्रकरणमाथि जाँबुझ गर्न दलहरुले उच्च स्तरीय आयोग गठन गर्ने तयारी सुरु गरेका छन् । आयोगको समयसीमा, क्षेत्राधिकार र नेतृत्वबारे प्रारम्भिक मस्यौदा तयार भएको दलहरुको दाबी छ । भदौ ६ मा भएको सर्वदलीय सहमति अनुसार यही असोज ५ गते अयोग घोषणा भइसक्नुपर्ने थियो ।

यसैबीच, साता दिन पहिले विमानस्थलबाहिरबाट तस्करीकाे एक केजी सुन बरामद प्रकरणमा पक्राउ परेका बाबुलाल दाेङ सहित काभ्रेका ३ जनाकाे अनुसन्धान पह्ररीकाे न्यायिक हिरासतमा भइरहेकाे प्रहरीले जनाएकाे छ । 

उक्त प्रकरणमा दुबइबाट सुन मलद्वारमा राखेर भरिया बनेर सुन ल्याउन दाेङले लगानीकर्ताबारे मुल खाेलेकाे बताइन्छ । लगानीकर्ता (साहु) काभ्रेका तरूण दलका नेता विकास लामा र माओवादी केन्द्रनिकट नबिन लामा भएकाे खुलेकाे छ । उनीहरू फरार छन् । प्रहरीले खाेजी गरिरहेकाे छ ।